Հանրապետական կուսակցությունը դեռ չի հաստատել տարածքային ընտրական ցուցակներում առաջադրվողների ցանկը, սակայն ներքին կարգով շատերն արդեն ստացել են համաձայնությունը առաջադրվելու վերաբերյալ։

ՀՀԿ խմբակցության պատգամավոր Աշոտ Աղաբաբյանը (Բուռնաշ), որը նախորդ ընտրություններում Շիրակի մարզից ընտրվել էր մեծամասնական ընտրակարգով, NEWS.am–ի հետ զրույցում ասաց, որ դեռ առաջադրվելու վերաբերյալ կուսակցության համաձայնությունը չի ստացել։

«Առաջադրում է կուսակցությունը, մենք չենք կարող առաջադրվել առանց կուսակցության համաձայնության, եթե կուսակցությունը առաջադրի՝ կառաջադրվեմ։ Ես բազմիցս ասել եմ՝ դա ցանկության խնդիր չէ, նպատակահարմարության խնդիր է, բնականաբար, եթե երիտասարդներն են գալու, խնդիր չկա, տեղս կարող եմ զիջել, հատկապես եթե կուսակցությունը այդպես որոշի»,-ասաց նա:

Պատգամավորը կարծում է, որ իր կողմից իշխանություններին, հարկային մարմիններին ուղղված քննադատությունները չեն ազդի կուսակցության որոշման վրա. «Ես չեմ գտնում, որ պահվածքը, մաքրությունը, ազնվությունը կուսակցությունը հաշվի չի առնի, եթե իմ տեղը ավելի երիտասարդ ու աշխույժ, կրթված մարդիկ լինեն, թող լինեն, ավելի լավ»։

Անկախ կուսակցության որոշումից՝ ՀՀԿ–ականը  վստահեցնում է, որ  ընտրություններին աշխատելու է հարազատ կուսակցության օգտին։