Երբ Հյաստանում նորմալ պայմաններ ստեղծվեն, այդ ժամանակ էլ հնարավոր կլինի գաղափարական պատերազմ նախաձեռնել: Այս մասին NEWS.am-ի հետ զրույցում հայտարարեց Հայաստանի Դեմոկրատական կուսակցության նախագահ Արամ Գ. Սարգսյանը՝ պատասխանելով այն հարցին, թե ինչպես է պատկերացնում ստեղծվող Օհանյան-Օսկանյան-Դալլաքյան-Սարգսյան նախընտրական դաշինքի գործունեությունը դրան քաղաքական գործիչ, «Ազգային ինքնորոշում» միավորման ղեկավար Պարույր Հայրիկյանի միանալուց հետո, որը հայտնի է իր խիստ հակառուսական դիրքորոշմամբ:
Սարգսյանի խոսքով՝ իրենց համար առաջնահերթ է ոչ թե հակառուսական կամ հակաեվրոպական կողմնորոշման քննարկումը, այլ երկրում փոփոխությունների հասնելը: «Ոչ մեկն իր հետ այդպիսի խնդիրներ չի բերի: Համակարգային փոփոխությունների հասնելու խնդիր է դրված: Հայաստանում անհրաժեշտ է այնպիսի իրավիճակ ստեղծել, երբ հնարավոր կլինի արդարացի ընտրություններ անցկացնել: Ցավոք, գործող իշխանությունները այսօր դա չեն ապահովում: Այսօր անիմաստ է խոսել, այսպես կոչված, արտաքաղաքական կողմնորոշման մասին: Այսօրվա դրությամբ ակնհայտ է, որ մենք Ռուսաստանի դաշնակիցն ենք: Չէ՞ որ դա չի փոխվելու: Եթե նրանք նույն կարծիքին մնան, որ հնարավոր է միասին լուծել դրված խնդիրը, թող միանան»,- ասաց Արամ Գ. Սարգսյանը:
Հստակեցնող հարցին՝ Հայրիկյանի արտաքաղաքական կողմնորոշումը փոփոխությունների ենթարիկվե՞լ է, Դեմկուսի ղեկավարը պատասխանեց. «Դա պետք է ինքը որոշի: Եթե նա միավորվում է, նշանակում է մեր մոտեցումը կիսում է: Թող նա արեւմտամետ լինի, դրանից ինչ-որ բան կփոխվի՞: Իրականությունն այն է, որ մենք Ռուսաստանի հետ պայմանագրային լուրջ հիմքեր ունենք, դա այդպես էլ կշարունակվի»:
Հիշեցնենք, որ խորհրդային նախկին այլախոհ Պարույր Հայրիկյանի «Ազգային ինքնորոշում» միավորումը, որը հայտնի է իր հակառուսական հայտարարություններով, հայտարարել է ԱԳ նախկին նախարար Վարդան Օսկանյանի, նախագահի աշխատակազմի ղեկավարի նախկին տեղակալ, ԱԺ-ում նախագահի նախկին ներկայացուցիչ Վիկտոր Դալլաքյանի, Դեմոկրատական կուսակցության նախագահ Արամ Գ. Սարգսյանի եւ պաշտպանության նախկին նախարար Սեյրան Օհանյանի ստեղծած նախընտրական դաշինքին միանալու մասին: