Թուրքիայի տրանսպորտի եւ հաղորդակցության նախարար Ահմեդ Արսլանը նոր հայտարարություն է արել Հայաստանը շրջանցող նոր երկաթգծի գործարկման ժամկետների վերաբերյալ։
Թուրքական Milliyet-ի փոխանցմամբ՝ Թուրքիայի տրանսպորտի եւ հաղորդակցության նախարարը նշել է, թե երկու ամսից արդեն պատրաստ կլինի Բաքու-Թբիլիսի-Կարս երկաթգիծը։
Երկաթգծի հետ կապված նա շեշտել է, թե այն Բաքու հասնելուց հետո կբաժանվի եւս երկու գծի՝ ապահովելով դեպի Չինաստան ու Միջին Ասիա բեռների փոխադրումը։
«Եթե այժմ Անգլիայից կամ Ֆրանսիայից ապրանքը Չինաստան է հասնում 55-ից 60 օրում, ապա նոր երկաթգծով այդ տեւողությունը կիջնի մինչեւ 15 օր»,-ասել է Ահմեդ Արսլանը։
Նշենք, որ Հայաստանը շրջանցող Բաքու-Թբիլիսի-Կարս երկաթգիծը կառուցվում է Ադրբեջանի ու Թուրքիայի նախաձեռնությամբ։ Շինարարության բյուջեն սկզբնական նախատեսված է եղել մոտ 300 մլն դոլար, սակայն այժմ այն անցել է 1 մլրդ դոլարը։