Հայաստանի ԱԳ նախարարությունը պարզում է Կոլումբիայում ազատված Արսեն Ոսկանյանի քաղաքացիությունը: Այս մասին NEWS.am-ին ասաց ԱԳՆ մամուլի քարտուղար Տիգրան Բալայանը:
Columbia vanguardia-ը հայտնում է, որ հունվարի 21-ին Կարմիր խաչի միջազգային կոմիտեն հաստատել է, որ ազատվել է Ազգային ազատագրության բանակի կոլումբիական պարտիզանական Resistencia Cimarrón խմբավորման կողմից գերեվարված Արսեն Ոսկանյանը:
Տեղական իշխանությունները ենթադրում են, որ տղամարդն առեւանգվել է Կոլումբիայի Չոկո գավառում ոսկեգույն գորտերի որսի ժամանակ՝ դրանք երկրից ապօրինի արտահանելու նպատակով:
Նախնական տեղեկությունների համաձայն՝ Ոսկանյանը ծագումով Հայաստանից է, սակայն Կոլումբիա է մեկնել ռուսական անձնագրով:
Դեղին գորտը մահացու թույն է արտադրում, որը եվրոպական լաբորատորիաներում օգտագործում են ցավազրկողներ պատրաստելու համար: Գորտի արժեքը սեւ շուկայում 1500 եվրոյի է հասնում:
