Սահմանադրական փոփոխություններից հետո խորհրդարանական աշխատանքն ավելի հրապուրիչ է դառնում, քանի որ մեծանում է այդ կառույցի դերը կառավարման համակարգում։ Այս մասին NEWS.am–ի հետ զրույցում ասել է Շիրակի նախկին մարզպետ Ֆելիքս Ցոլակյանը՝ անդրադառնալով իր առաջադրվելուն։
Նշենք, որ Շիրակի մարզում Հանրապետական կուսակցության տարածքային ցուցակով առաջադրվելու է նաեւ Ֆելիքս Ցոլակյանը։ Նախնական տեղեկություններով՝ ՀՀԿ ցուցակով առաջադրվելու են նախկին ԲՀԿ–ական Մարտուն Գրիգորյանը, Ֆելիքս Ցոլակյանը, ՀՀԿ խմբակցության պատգամավորներ Սուքիաս Ավետիսյանը, Արման Սահակյանը։ Մինչեւ 15 թեկնածու կարող է առաջադրվել։
«Ես մտադրություն ունեմ առաջադրվելու, բայց վերջին հաշվով կուսակցությունը պետք է հաստատի թեկնածությունը, դեռ չի հաստատել։ Խորհրդարանի կարգավիճակի փոփոխությունից հետո ավելի հրապուրիչ է դառնում պատգամավորի աշխատանքը, ավելի հեռանկարային։ Դա նպաստել էնման որոշում կայացնելուն»,–ասել է Ցոլակյանը։
Ինչ վերաբերում է թեժ մրցակցությանը, նշել է, որ եթե վստահ չլիներ, որ իրեն չի գնահատի գյումրեցի ընտրողը, չէր մտնի ընտրապայքարի մեջ։
«Որեւէ տեղ խոչընդոտ չեմ սպասում։ Միմյանցից ձայն կորզելու խնդիր չկա, կամ մյուսի ձայնը տանելու հարց չկա, յուրաքանչյուրը թող զբաղվի իր էլեկտորատով եւ իր ձայները տանի։ Շիրակում միշտ էլ թեժ է ամեն ինչ»։
