Արցախում հունվարի 22–ին հակառակորդի կրակոցից զոհված պայմանագրային զինծառայող Կարեն Ուլուբաբյանը եղել է 2014թ. օգոստոսին ղարաբաղա-ադրբեջանական շփման գծում Ադրբեջանի կողմից կազմակերպված դիվերսիոն գործողությունները հետ մղողներից մեկը: Այս մասին այսօր` հունվարի 23-ին, NEWS.am-ի հետ զրույցում ասաց Մարտունու շրջանի վարչակազմի ղեկավար Կարեն Թովմասյանը: Այդ ժամանակ Կարենը եղել է շարքային զինծառայող, որից հետո պայմանագարյին ծառայության է անցել Զինված ուժերում: Նա նշեց, որ Կարենի հայրը եւս արցախյան ազատամարտի մասնակից է եղել, իսկ հորեղբայրը պարգեւատրվել է «Մարտական խաչով»:
«Իրեն հորեղբոր անունով են դրել, իր հայրիկին, հորեղբորը բոլորը ճանաչում են: Կարենը օգոստոսին էր անցել պայմանագրային ծառայության, ինքն էլ իր հայրիկի նման քաջ տղա էր»,-ասաց նա:
Կարեն Ուլուբաբյանը ընտանիքի ավագ որդին էր` ունի իրենից փոքր քույր եւ եղբայր: Նրա եղբայրը նույնպես ծառայում է Արցախում` նույն զորամասում:
Ավելի վաղ տեղեկացրել էինք, որ Արցախի Մարտունի քաղաքից էր, մի քանի ամիս առաջ էր ծառայության անցել։
Ըստ Պաշտպանության բանակի մամուլի ծառայության՝ հունվարի 22-ին՝ ժամը 23:25-ի սահմաններում, ՊԲ արեւելյան ուղղությամբ տեղակայված զորամասերից մեկի պահպանության տեղամասում, մահացու վիրավորում է ստացել պայմանագրային զինծառայող, 22–ամյա Կարեն Մարատի Ուլուբաբյանը: Դեպքի մանրամասները պարզելու համար կատարվում է քննություն: