Եվրոպայի խորհրդի խորհրդարանական վեհաժողովի նախագահ Պեդրո Ագրամունտի վերընտրությունը զուտ ֆորմալ բնույթ էր կրում։ Այս մասին NEWS.am–ի թղթակցի հետ զրույցի ժամանակ ասել է ԵԽԽՎ-ում հայկական պատվիրակության անդամ, ՀՀԿ պատգամավոր Սամվել Ֆարմանյանը։
Նրա խոսքով, ԵԽԽՎ ղեկավարի փոփոխությունը տեղի է ունենում 2 տարին մեկ՝ ռոտացիոն սկզբունքով։ «Եվ այս պաշտոնը բաժին է հասնում ԵԽԽՎ-ում ներկայացված քաղաքական ուժերից մեկին։ Վերջին ռոտացիայով պաշտոնը հատկացվել էր Եվրոպական ժողովրդական կուսակցության խմբակցությանը։ Մեկ տարի առաջ ԵԺԿ-ն առաջադրել էր Պեդրո Ագրամունտի թեկնածությունը։ Ու ԵԽԽՎ-ժում գոյություն ունեցող ավանդույթի համաձայն, առաջադրումները արվում են 2 տարվա համար»,- նշեց Սամվել Ֆարմանյանը։ Եվ ԵԺԿ-ն, շարունակեց պատգամավորը, «թարմացրել է» իր թեկնածությունը, նորից առաջադրելով Ագրամունտին։ «Որեւէ այլ քաղաքական մեխանիզմ, որը թույլ կտար կանխել այս պաշտոնում մի մարդու գտնվելուն, որն արդեն մեկ տարի է զբաղեցնում է այն, գոյություն չունի, ու նման նախադեպ չի եղել։ Մենք իհարկե բարձրացրել ենք կոռուպցիոն սկանդալին Ագրամունտի մասնակցության մասին բոլոր հարցերը ու շարունակում ենք անել դա։ Բայց սա այն մեխանիզմը չէ, որը կարող է խոչընդոտել ԵԽԽՎ-ի արդեն գործող նախագահի վերընտրմանը»,- հավելեց Սամվել Ֆարմանյանը։
Հիշեցնենք, որ հունվարի 23-ին ԵԽԽՎ-ն ձմեռային նստաշրջանի բացման ժամանակ ավտոմատ կերպով վերընտրել է նախագահ Պեդրո Ագրամունտին։
Միլանի դատախազությունը գործ է հարուցել ԵԽԽՎ նախկին փոխնախագահ, ԵԽԽՎ-ում ԵԺԿ խմբի պատվավոր նախագահ Լուկա Վոլոնտեի դեմ։ Այդ սկանդալային գործում հիշատակվում է նաեւ Պեդրո Ագրամունտի անունը։ Ագրամունտը ու ԵԽԽՎ տարբեր խմբերի ղեկավարներ, նաեւ տարբեր պատգամավորներ ներգրավված են եղել Բաքվի շահերը սպասարկելու համար Ադրբեջանից 3 մլն եվրո կաշառք ստանալու մասին սկանդալային պատմության մեջ։