Մի շարք եվրոպական երկրներում անցկացված ոստիկանական գործողության ընթացքում ձերբակալվել է 245 մարդ, որոնց կասկածում են զենքի առեւտրի մեջ, հայտնում է Իսպանիայի քաղաքացիական գվարդիան, փոխանցում է «ՌԻԱ Նովոստին»։
Ըստ հաղորդագրության՝ այդ գործողությունը օգնել է կանխել զենքի հայտնվելը հանցագործների՝ այդ թվում իսլամական ահաբեկիչների ձեռքերում։
Գործողությանը մասնակցել են 11 եվրոպական երկրների իրավապահներ, նաեւ Եվրոպոլը։
Առգրավվել է ընդհանուր առմամբ 664 միավոր զենք, որից 247-ը՝ Իսպանիայում։ Իսպանիայում 46 մարդ է ձերբակալվել։ Հրազենից բացի առգրավվել է 33 748 փամփուշտ, ձեռքի նռնակներ, խլացուցիչներ։
Իսպանական ոստիկանությունը հայտնաբերել է հին զենքի վերանորոգման ու զինամթերքի արտադրման չորս արհեստանոց , նաեւ համացանցի միջոցով զենքի վաճառքի երկու կետ։ Իսպանիայում 46 խուզարկություն է իրականացվել։ Ձերբակալվածները հին զենքը գնում էին Արեւելյան Եվրոպայի երկրներում, վերանորոգում այն ու վերավաճառում։ Բացի դրանից այդ նույն գործողության ընթացքում հայտնաբերվել է նաեւ մարիխուանայի երկու պլանտացիա։