Եթե վարորդները համաձայն չեն ԱՊՊԱ–ի փոխհատուցման հետ, պետք չէ մեքենան վերանորոգման հանձնել։ Այս մասին հունվարի 24-ին՝ 2016-ի ընթացքում իր կառույցի աշխատանքի արդյունքները ներկայացնելիս, ասաց ֆինանսական օմբուդսմեն Փիրուզա Սարգսյանը։

Նրա խոսքով՝ այդ դեպքում պետք է դիմել սկզբում ապահովագրական ընկերությանը եւ փորձել համաձայնության գալ։ Հետո կարելի է դիմել ֆինանսական օմբուդսմենին։ Անցյալ տարի օմբուդսմենի գրասենյակի ընդունած բողոքներից 10-ից 8-ը վերաբերվում էին հենց ԱՊՊԱ–ի գործերին։ Որպեսզի ավելի լավ հասկանաք ձեր իրավունքներն ու պարտականությունները ապահովագրողի առաջ, Սարգսյանը խորհուրդ է տալիս ծանոթանալ ԱՊՊԱ-ի փոխհատուցումների վճարումների պարզեցումներին։

ճանապարհատրանսպորտային պատահարի հետեւանքով պատճառված վնասի դիմաց փոխհատուցում ստանալու համար բավական կլինի սեփական ապահովագրական ընկերությանը դիմելը: Ընկերությունն էլ կփոխանցի փոխհատուցման գումարը, որը հետագայում հետ կստանա մեղավոր կողմի ապահովագրողից:

Դրանից բացի, բազմակի կկրճատվեն փոխհատուցումների ժամկետները. պարզեցված (ապահովագրական այն դեպքերում, որոնք բարդ քննություն չեն պահանջի) ժամկետը 9 – 81 օրից կկրճատվի մինչեւ 6 – 17 օր, իսկ ստանդարտ դեպքերում՝ 16 – 119 օրից մինչեւ 10 – 41: Կմեծացվի նաեւ ապահովագրական մեկ դեպքի համար փոխհատուցման շեմը: Առայժմ մեկ տուժողը առողջությանը պատճառված վնասի դիմաց կարող է ստանալ մինչեւ 3,3 մլն դրամ եւ մինչեւ 1,8 մլն դրամ գույքին պատճառված վնասի դիմաց: Իսկ մեկ պատահարի ընթացքում բոլոր տուժողների համար շեմը կազմում է 10 մլն դրամ՝ առողջության դիմաց եւ նույն 1,8 մլն դրամը գույքի դիմաց: Իսկ 2017-ի ապրիլի 1-ից բոլոր տուժողների համար առավելագույն փոխհատուցումը կկազմի 33 մլն դրամ՝ առողջությանը պատճառված վնասի դիմաց եւ 18 մլն՝ գույքի դիմաց (այսինքն՝ տասնապատիկ ավելի փոխհատուցում մեկ պատահարի համար): Բոլոր փոփոխություններն ավտոմատ ուժի մեջ կմտնեն 2017-ի ապրիլի 1-ից՝ ինչպես նոր, այնպես էլ գործող ԱՊՊԱ պայմանագրերի համար։