Փաստաբան Նիկոլայ Բաղդասարյանը որոշում է կայացրել քաղաքականություն մտնելու: Այս մասին այսօր՝ հունվարի 24-ին, NEWS.am-ի հետ զրույցում ասաց նա՝ նշելով, որ որոշում է կայացրել միանալ «Ելք» դաշինքին եւ ռեյտինգայինով առաջադրվել:
«Ուսումնասիրել եմ ամբողջ դաշտը, փորձել եմ գտնել իմ գաղափարներին համահունչ ուժ, տեսել եմ, որ «Ելք» դաշինքն իմ պատկերացմամբ համահունչ է իմ գաղափարներին: Որոշել եմ նախաձեռնություն դրսեւորել եւ դիմել իրենց ղեկավարությանը, որպեսզի այդ գործընթացներին մասնակից դառնամ: Ինչու եմ որոշել մասնակից դառնալ, որովհետեւ իմ մի քանի տարվա իրավաբանական գործընթացը ցույց տվեց, որ շատ դժվար է, երբ որեւէ մասնակցություն չես ունենում եւ քննադատողի դերում ես հանդես գալիս, չես կարողանում ինչ-որ բան փոխել: Կարծում եմ, որ իմ մասնակցությամբ ինչ-որ բան կկարողանամ փոխել»,-ասաց նա:
Նիկոլայ Բաղդասարյանը նշեց, որ մտադիր չէ քաղաքականություն մտնելուց հետո այդ դաշտում երկար շարունակել գործունեությունը, նրա խոսքով՝ սիրում է իր՝ փաստաբանի աշխատանքը եւ հուսով է, որ շուտով կրկին կզբաղվի այդ աշխատանքով:
«Հուսով եմ, որ քաղաքականությամբ անվերջ չեմ զբաղվի, ես սիրում եմ իմ փաստաբանական գործունեությունը եւ անպայման վերադառնալու եմ իմ փաստաբանի աշխատանքին: Քաղաքականություն մտնում եմ ոչ թե պաշտոն ստանձնելու, այլ ինչ-որ բան փոխելու: Իմ անձի համար առաջնայինը օժանդակելն է «Ելքին», որպեսզի ինչ-որ արդյունքի գան»,-ասաց նա: