Մեզ համար կարեւոր է Հայաստանում ընտրությունների գործընթացի մաքուր բնույթը, կարծում եմ, ՀՀ քաղաքական վերնախավը հասկանում է, թե երկրի զարգացման, երկրի ապագայի համար արդար ու թափանցիկ ընտրությունները կարեւոր են: Այս մասին այսօր՝ հունվարի 24-ին, լրագրողների հետ հանդիպման ժամանակ նշել է Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
Նրա խոսքով, իշխանությունները վստահեցրել են, որ այս ընտրություններն այլ որակ են ունենալու, բարձրանալու է ընտրողների վստահությունը ընտրական գործընթացի նկատմամբ:
Ինչ վերաբերում է իշխանության, ընդդիմության եւ քաղաքացիական հասարակության ներկայացւոիչների միջեւ «4+4+4» ձեւաչափով բանակցությունների արդյունքներին, Սվիտալսկին ասաց. «Անցյալ ամիս մեծ ճնշում կար բոլորիս վրա, որպեսզի այդ պայմանավորվածությունները կյանքի կոչվեն: Գոհունակությամբ կարող եմ ասել, որ հաջող ջանքեր գործադրվեցին այն մասով, որը վերաբերում է ընտրողների նույնականացման տեխնոլոգիային: Այն շատ արդյունավետորեն ի կատար ածվեց ՄԱԿ-ի զարգացման ծրագրի կողմից, թեպետ գործընթացը բավական բարդ էր, բայց ցուցաբերվեց կառուցողական մոտեցում: Լիահույս ենք, որ ընտրողների նույնականացման տեխնոլոգիան շուտով կհասնի Հայաստան, հավանաբար փետրվարին, կփորձարկվի, որ քվեարկության օրվա դրությամբ այն պատրաստ լինի»,- նշեց դեսպանը:
Ինչ վերաբերում է տեսախցիկներին, ապա, ըստ Սվիտալսկու, մրցույթին մասնակից հայտատուն առաջարկել է պահանջկոտ պարամետրերի դիմաց գին, մինչդեռ այդ պարամետրերը չափազանց մեծ են՝ առկա ֆինանսավորումը հաշվի առնելով. «Ես լավատես եմ, որ լուծում, այնուամենայնիվ, կգտնվի, ընկերությունը կհամաձայնվի, կգտնվի ընդունելի լուծում կուսակցությունների համար: ԵՄ տեսանկյունից կարող եմ ասել, որ մենք կոչ կանենք խելամիտ կոմպրոմիս գտնել: Մենք չենք կարող ունենալ լուծում, որը բոլորի համար գոհացուցիչ կլինի թե՛ ընդդիմության համար, թե՛ իշխանության համար: Ժամանակը կարճ է, ուստի մենք քաջալերում ենք խելամիտ կոմպրոմիսի տարբերակ գտնել, որպեսզի համաձայնագրի մյուս մասերն էլ ի կատար ածվեն: Ես կոչ կանեմ բոլորին աշխատել մայիսին: Չի լինելու լուծում, որը 100 տոկոսանոց երաշխիք կտա, որ որեւէ սողանցք չի մնա, բայց մեր տեսանկյունից լավ է ձգտել դրա իրագործմանը, եթե այն անգամ կատարյալ չէ»:
Նրա խոսքով, պետք է գտնվի լուծում, որը իրագործելի կլինի այդ ընկերության կողմից. «Ժամանակ չկա զրոյից սկսել բանակցությունները, գործընթացը: Հուսով եմ, որ մինչեւ շաբաթվա վերջ հարցը կպարզվի: Որքանով ես եմ տեղյակ կառավարությունը պատրաստ է անել հնարավորը, որ այդ գործոնը չբարդացնի լուծում գտնելը»:
