Ռուսաստանյան կապիտալը լայնորեն ներկայացված է Հայաստանի տնտեսությունում, այնուամենայնիվ, կարծում եմ, որ պետք չէ հանգստանալ, եւ այսօր կարող ենք քննարկել ակտիվացնելու եւ նոր ազդակ հաղորդելու ուղղությունները: Այս մասին, այսօր՝ հունվարի 24-ին, Մոսկվայում Ռուսաստանի վարչապետ Դմիտրի Մեդվեդեւի հետ հանդիպման ժամանակ նշել է ՀՀ վարչապետ Կարեն Կարապետյանը, ով երկօրյա պաշտոնական այցով գտնվում է Ռուսաստանի Դաշնությունում:
Կառավարությունից NEWS.am-ին հայտնում են, որ այցի շրջանակում ՀՀ վարչապետ Կարեն Կարապետյանին Ռուսաստանի Դաշնության կառավարության նախագահի «Գորկի» կեցավայրում ընդունել է ՌԴ վարչապետ Դմիտրի Մեդվեդեւը:
ՌԴ եւ ՀՀ վարչապետերի միջեւ տեղի է ունեցել առանձնազրույց, որին հաջորդել է Դմիտրի Մեդվեդեւի եւ Կարեն Կարապետյանի հանդիպումն ընդլայնված կազմով՝ երկու երկրների պաշտոնական պատվիրակությունների մասնակցությամբ՝ աշխատանքային նախաճաշի ձեւաչափով:
ՀՀ վարչապետ Կարեն Կարապետյանն իր խոսքում ասել է.
«Հարգելի Դմիտրի Անատոլիի,
նախ եւ առաջ ցանկանում եմ շնորհակալություն հայտնել Մոսկվա այցելելու հրավերի եւ մեր պատվիրակությանը ցուցաբերած ընդունելության համար: Օգտվելով առիթից՝ ցանկանում եմ շնորհավորել Ձեզ «Եդինայա Ռոսիա» կուսակցության նախագահի պաշտոնում ընտրվելու կապակցությամբ, մաղթել հաջողություններ եւ համոզմունք հայտնել, որ ամեն ինչ լավ կլինի:
Այսօրվա հանդիպումը լավ հնարավորություն է՝ հայ-ռուսական համագործակցության ակտուալ ուղղությունները քննարկելու համար, եւ ցանկանում եմ Ձեզ հավաստիացնել, որ մեր պատվիրակությունը եկել է շատ դրական եւ գործնական տրամադրվածությամբ:
Ավանդաբար մեր՝ հայ-ռուսական հարաբերությունների օրակարգը բավական հագեցած է: Ինչպես Դուք արդեն նշեցիք, վերջին տարիներին համաշխարհային բարդ կոնյուկտուրայի պայմաններում մեր կառավարություններին հաջողվել է առաջ շարժվել: Գիտեք, որ ռուսաստանյան կապիտալը լայնորեն ներկայացված է Հայաստանի տնտեսությունում: Այնուամենայնիվ, կարծում եմ, որ պետք չէ հանգստանալ, եւ այսօր կարող ենք քննարկել ակտիվացնելու եւ նոր ազդակ հաղորդելու ուղղությունները: Այսօր Հայաստանում մի շարք բարեփոխումներ են իրականացվում ներդրողների համար բարենպաստ միջավայր ձեւավորելու նպատակով, եւ մենք մեծապես կողջունենք ռուսաստանյան կապիտալի ներգրավումը: Այս համատեքստում մենք այսօր եկել ենք մի շարք նոր առաջարկություններով, որոնք թույլ կտան դիվերսիֆիկացնել եւ ընդլայնել մեր համագործակցության ոլորտները: Ես նույնպես վստահ եմ, որ կառուցողական զրույց է լինելու: Եվս մեկ անգամ շնորհակալություն հրավերի համար»:
Աշխատանքային նախաճաշի շրջանակում երկու երկրների պաշտոնական պատվիրակությունների հանդիպմանը քննարկվելու են Հայաստանի եւ Ռուսաստանի համար կարեւորություն ներկայացնող հարցերի լայն շրջանակ, ստորագրվելու են մի շարք փաստաթղթեր: