«Ֆրիդրիխ Էբերտ» հիմնադրամի հայաստանյան գրասենյակը այսօր՝ հունվարի 24-ին, ներկայացրեց «Անկախության սերունդ հետազոտություն երիտասարդների շրջանում, Հայաստան 2016թ.» ուսումնասիրության արդյունքները։
Հետազոտությունը իրականացվել էր Երեւանի Պետական Համալսարանի Սոցիոլոգիայի ֆակուլտետի աջակցությամբ։ Որպես տարիքային խումբ ընտրվել էին 14-29 տարեկան երիտասարդները, որոնք մեծացել են Խորհրդային Միության փլուզումից հետո՝ անկախ Հայաստանում, եւ ներկայացնում են մի կողմից՝ խորհրդային ժառանգության եւ մյուս կողմից՝ հայաստանյան հասարակության հետագա զարգացման սերունդը։ Հետազոտությունը բացահայտում է Հայաստանի երիտասարդների մտահոգությունները, ձգտումները, արժեքները եւ կենսակերպը։
Ըստ միջոցառման բանախոս, Հարավային Կովկասում «Ֆրիդրիխ Էբերտ» հիմնադրամի ղեկավար Ջուլիա Բլասիուսի՝ հենց երիտասարդ սերունդը պետք է հասկանա, աջակցի եւ խթանի երկրում դրական փոփոխությունները՝ հասկանալով առկա հիմնախնդիրները։ Նա նշեց նաեւ, որ հատկանշական է այս հետազոտության արդյունքների հրապարակումը ընտրություններից առաջ, ինչը փոփոխության հույս է ներշնչում։
Հանդիպմանը ներկա էր նաեւ ՀՀ կրթության եւ գիտության փոխնախարար Կարինե Հարությունյանը։ Նա շեշտեց այս հետազոտության կարեւորությունը նախարարության հետագա ռազմավարական աշխատանքների համար։