Էքստրասենս Անի Մաջնունյանի սպանության գործով միակ առանցքային վկա Աննա Միսակյանի, նրա ամուսնու եւ 4-ամսական երեխայի՝ շմոլ գազի հետեւանքով խեղդվելը պատահականություն չէ: Այս մասին NEWS.am-ի հետ զրույցում ասաց «Նուբարաշեն» ՔԿՀ-ից խմբագրություն զանգահարած Էքստրասենս Անի Մաջնունյանի սպանության մեջ մեղադրվող Մուշեղ Մխիթարյանը:

«Ինչ ունենք այս գործով հիմա՝ սպանված վկա, մեղադրյալ, որը բանտում է եւ Անի Զախարյան, որը խելքից դուրս ցուցմունք է տվել: Ես ավելի քան համոզված եմ, որ Աննայի եւ նրա ընտանիքի անդամների մահը պատահականություն չէ, այդ դեպքը պատահականություն անվանելը մեծ ճոխություն կլինի»,-ասաց նա՝ նշելով, որ ազատության մեջ կա ինչ-որ մեկը, որին ձեռնտու չէին Աննա Միսակյանի ցուցմունքները, որոնք նա պատրաստվում էր տալ դատարանում՝ առաջիկա նիստերի ընթացքում:

Ավելի վաղ NEWS.am-ը տեղեկացրել էր, որ Մուսալեռում հունվարի 8-ին ամուսնու եւ 4-ամսական երեխայի հետ բնակարանում մահացած հայտնաբերված Աննա Միսակյանը էքստրասենս Անի Մաջնունյանի սպանության գործով կարեւոր վկա Աննա Միսակյանն է:

Հիշեցնենք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել էր «6-րդ զգայարան» հաղորդաշարի էքստրասենս, 53-ամյա Անի Մաջնունյանի դին՝ բազմաթիվ ծակած-կտրած վնասվածքներով:

Սպանության մեջ մեղադրվում է 21-ամյա Մուշեղ Մխիթարյանը, որին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ): Նա կալանավորված է, չի ընդունում իր մեղքը: