Քաղաքական դաշտի վերջին օրերի գլխավոր ինտրիգը հանգուցալուծվեց. Հովիկ Աբրահամյանը հեռանում է Հանրապետական կուսակցությունից: Որոշումն արդեն կայացրել է, իսկ դիմումը, հավանաբար, վաղը կներկայացնի: Հատկանշական է, որ կարեւոր այդ որոշումը նախկին վարչապետը հրապարակել է իր ծննդյան օրը:
Իսկ լուրերը վաղուց էին շրջանառվում: Ասում էին՝ Աբրահամյանը երկար ժամանակ նախագահ Սերժ Սարգսյանին համոզում էր՝ իրեն ՀՀԿ նախընտրական շտաբի ղեկավար նշանակել: Լավատեղյակ աղբյուրներն էլ հակադարձում էին. նման հարց չի էլ քննարկվել: Ամեն դեպքում, անցած հինգշաբթի կայացած Հանրապետականի գործադիր մարմնի նիստին Աբրահամյանը չի մասնակցել, իսկ հետո ասում էին՝ անսպասելիորեն Մոսկվա է մեկնել ու հանդիպումներ ունեցել այդ երկրի քաղաքական իշխանության ներկայացուցիչների հետ:
Հանրապետականում Աբրահամյանի հեռանալուն նորմալ են վերաբերվում: Կուսակցության մամուլի խոսնակն ասում է՝ յուրաքանչյուրի ընտրությունն է` ինչպես շարունակել քաղաքական գործունեությունը: Էդուարդ Շարմազանովը նաեւ տեղեկացրել է, որ երկու օրից կուսակցության գործադիր մարմնի եւ խորհրդի նիստեր են գումարվելու, այդ ժամանակ էլ կտրվեն բոլոր հարցերի պատասխանները:
Ինքը՝ Հովիկ Աբրահամյանը, հարազատ կուսակցությունը լքելու պատճառների մասին հիմա չի ուզում խոսել: Ասում է միայն, որ քաղաքականությունից չի հեռանալու, ինչը նոր ինտրիգ է առաջացրել. ո՞ր ուժի հետ է նախկին վարչապետն ընտրությունների գնալու: Լուրեր են շրջանառվում, որ նա քաղաքական ուղին շարունակելու է իր խնամի Գագիկ Ծառուկյանի հետ՝ միանալով նրա ստեղծած դաշինքին, թեեւ ինքը հավաստում է, որ դեռեւս նման որոշում չի կայացրել: Հարցական է նաեւ, արդյո՞ք հոր օրինակով Հանրապետականի շարքերը կլքի նախկին վարչապետի որդին՝ Արտաշատի քաղաքապետ Արգամ Աբրահամյանը:
«Ծառուկյան դաշինքին» միանալու որոշման մասին այսօր հայտնել է Սոցիալ-դեմոկրատական Հնչակյան կուսակցությունը: Կուսակցության ատենապետ Նարեկ Գալստյանը գոհ է բանակցություններից, որոնց արդյունքում էլ որոշել են միանալ հենց այդ «լայն կոնսոլիդացիային»:
«Ծառուկյան դաշինքի» անունն այս օրերին քննարկվում է նաեւ մեկ այլ թեմայի առիթով: Դաշինքի նախընտրական շտաբը ղեկավարելու է Վերահսկիչ պալատի նախագահ Իշխան Զաքարյանը, իսկ քաղաքական տարբեր ուժերի ներկայացուցիչներ կասկածի տակ են դնում դրա օրինականությունը: Պարզաբանում են. նրա ղեկավարած կառույցը պետք է անկախ, ապաքաղաքական լինի:
Բայց Իշխան Զաքարյանը չի պատրաստվում հեռանալ Վերահսկիչ պալատի նախագահի պաշտոնից: Փոխարենը դիմում է գրել ու 2017 թվականի հունվարի 18-ից մինչեւ ապրիլի 5-ն իր հաշվին՝ չվճարվող արձակուրդում է լինելու:
Այսօր հայտնի դարձավ նաեւ, որ Զաքարյանի որդին ու կինը՝ նույնպես պետական պաշտոնյա, Երեւանի քաղաքապետարանի կրթության վարչության պետ Գայանե Սողոմոնյանը, դիմում են գրել ՀՀԿ-ին անդամությունը ժամանակավորապես կասեցնելու վերաբերյալ:
Խորհրդարանական ընտրություններին մասնակցելու մասին այսօր հայտարարել է եւս երկու կուսակցություն: Հայաստանի կոմունիստները պայքարի մեջ կմտնեն միասնական ուժով: Միասնական՝ բառի լայն իմաստով. Հայաստանի կոմունիստական կուսակցությունը եւ Հայաստանի առաջադիմական միացյալ կոմկուսը պատրաստվում են իրենց շուրջ համախմբել անհատների, հասարակական կազմակերպությունների եւ նույնիսկ սահմանափակ պատասխանատվությամբ ընկերությունների (ՍՊԸ):
Բոլորովին վերջերս՝ 2016 թվականի օգոստոսին հիմնադրված «Գործարար» կուսակցությունն էլ ընտրություններին մասնակցելու է, բայց հաղթելու նպատակ չի դրել: Գիտեն, որ «դժվար է լինելու», այդ պատճառով այս տարի փորձ ձեռք կբերեն՝ հաջորդ ընտրությունների համար:
Շարունակում է քննարկումների եւ քննադատությունների առիթ դառնալ նաեւ խորհրդարական ընտրություններն ապրիլի 2-ին նշանակելու որոշումը: Մի խումբ մտավորականներ, ինչպես նաեւ ՀԱԿ-ն ու «Համախմբումը» հայտարարում են, որ դա հակասահմանադրական է, քանի որ նոր Սահմանադրության համապատասխան դրույթը դեռեւս ուժի մեջ չի մտել: Բացի այդ՝ ապրիլի 2-ին լրանում է քառօրյա պատերազմի տարելիցը, սա էլ բարոյական խնդիր են համարում: Պահանջում են ընտրությունները նշանակել ապրիլի 21-30-ին, բայց երկու կուսակցություններն էլ դեռ չեն շտապում հետեւել ՀՀԿ-ի խորհրդին եւ Սահմանադրական դատարան դիմել:
Վարչապետ Կարեն Կարապետյանը Մոսկվայում է. ռուսաստանցի գործընկերն էր հրավիրել: Նախ Կարապետյանն առանձնազրույց է ունեցել Դմիտրի Մեդվեդեւի հետ, հետո նրանց են միացել նաեւ երկու երկրների կառավարությունների ներկայացուցիչները: Հանդիպումից կողմերը գոհ են. պաշտոնական լեզվով ասած՝ այն անցել է ջերմ, բարեկամական մթնոլորտում:
Մեդվեդեւն արձանագրել է. երկու երկրների տնտեսական հարաբերությունները զարգանում են տարբեր ոլորտներում, ԵՏՄ-ին Հայաստանի անդամակցությունն էլ նպաստել է կապերի խորացմանը: Ռուսաստանյան կապիտալը լայնորեն ներկայացված է Հայաստանի տնտեսությունում, Հայաստանի արտաքին առեւտրում ՌԴ-ի մասնաբաժինը գրեթե 25 տոկոս է, բայց, ինչպես Կարեն Կարապետյանն է արձանագրել, ներուժը մեծ է: Հայկական կողմն առաջարկել է հայ-ռուսական ներդրումային հիմնադրամ ստեղծել, որը հնարավորություն կտա ֆինանսավորել Հայաստանի համար առաջնահերթ համարվող տնտեսական ճյուղերը: Ռուսական կողմն առաջարկը դրական է գնահատել:
Կարեն Կարապետյանը նաեւ այս տարի ավելի մեծ թվով ռուսաստանցի զբոսաշրջիկների է սպասում Հայաստանում: Դրան կարող է նպաստել Հայաստանի կառավարության վերջին նիստում հավանության արժանացած որոշումը: Դրա համաձայն՝ Ռուսաստանի քաղաքացիներին իրավունք կտրվի ներքին անձնագրերով մեր երկիր ժամանել:
Հանդիպման ավարտին Կարեն Կարապետյանը ռուսաստանցի գործընկերոջը Երեւան այցելելու հրավեր է փոխանցել։
Սիրիայի կառավարության եւ ընդդիմության ներկայացուցիչները ոչ մի կերպ չեն կարողանում լեզու գտնել: Միջնորդների ջանքերով եւ մասնակցությամբ այս անգամ էլ Աստանայում հրավիրված բանակցություններն են փակուղի մտել: Հանդիպման ավարտին Ռուսաստանի, Իրանի եւ Թուրքիայի պատվիրակությունները համատեղ հայտարարություն են ստորագրել, բայց սիրիական «ընդդիմությունը» ոչ միայն հրաժարվել է ստորագրել եզրափակիչ կոմյունիկեն, այլեւ դժգոհություն է հայտնել հայտարարության բովանդակության կապակցությամբ:
Դրանում ասվում է, որ Ռուսաստանը, Իրանն ու Թուրքիան որոշում են կայացրել Սիրիայում հրադադարի մշտադիտարկման մեխանիզմ ստեղծելու մասին, նաեւ պարտավորվում են ապահովել այդ երկրում զինված ընդդիմության եւ ահաբեկիչների տարբերակումը: Իսկ կառավարության ներկայացուցիչը դժգոհ է հակամարտության կարգավորման հարցում Անկարայի դերից. ասում է՝ Թուրքիան Սիրիային ուզում է զրկել աշխարհիկ պետության կարգավիճակից: Խնդրի շուրջ հերթական քննարկումները նախանշված են փետրվարի 8-ին, Ժնեւում:
Հանցակազմ չկա եւ չի պատժվի: ԴԱՀԿ նախկին պետ Միհրան Պողոսյանի անվանն առնչվող քրեական գործով վարույթը կարճվել է: Պողոսյանի անունը կապում էին Պանամայի օֆշորային գործարքների հետ: Հրապարակումներ եղան, որ Միհրան Պողոսյանն օֆշորային ընկերություններ, ինչպես նաեւ բանկային հաշիվներ ունի: Սկանդալի պատճառով էլ հանրապետության գլխավոր հարկադիրը հրաժարական էր ներկայացրել:
Աշխատանքից ազատվել է 14 տարի աշխատանքի եւ սոցիալական հարցերի փոխնախարարի պաշտոնը զբաղեցրած Ֆիլարետ Բերիկյանը: Ուշագրավ է, որ նա բազմիցս հայտնվել է աղմկահարույց սկանդալներում, բայց Հանրապետականներն ամեն անգամ, այսպես ասած, խնայել են նրան:
Բերիկյանի համար, թերեւս, ճակատագրական եղան Բյուղերավանի գիշերօթիկ դպրոցում բացահայտված չարաշահումները: Պարզվում է՝ դպրոցի տնօրենը տարիներ շարունակ յուրացրել է պետության փողերը: Դպրոցի տուժած աշխատակիցների փաստաբան Տիգրան Հայրապետյանն ասում է՝ հաստատության տնօրենը գործել է Բերիկյանի ուղղակի թույլտվությամբ: Նրա հաղորդման հիման վրա երկու անգամ քրեական գործ է հարուցվել, բայց հետո կարճվել է:
Արցախում վիճաբանության ժամանակ հրազենային վիրավորում ստացած Ազնավուր Բալեյանին վերջապես հիվանդասենյակ են տեղափոխել: Նրա վիճակն արդեն լավ է: Նա Գեղարքունիքի մարզի Ծովազարդ գյուղից է: Նախնական տվյալներով՝ նա գլխի շրջանում հրազենային վիրավորում է ստացել ծառայակցի կողմից:
Իսկ մեկ շաբաթ առաջ Արցախում կրտսեր սերժանտի կողմից հրազենային վիրավորում ստացած Գուրգեն Սարգսյանի վիճակը շարունակում է մնալ ծանր, բայց արդեն դրական փոփոխություններ են նկատվում: Ժամկետային զինծառայողը Վայոց ձորի Հորբատեղ համայնքից է: Նա վիրավորվել է կրտսեր սերժանտի կողմից զենքի հետ վարվելու կանոնները խախտելու հետեւանքով:
Երեւանյան լճի սառած մակերեսին երեխաներ են խաղացել ու իրարանցում առաջացրել: Լճի հարեւանությամբ բնակվող մարդիկ փրկարարներին ահազանգել են, որ Երեւանյան լիճ երեխաներ են ընկել: Դեպքի վայրում պարզվել է, սակայն, որ սառցաշերտը, բարեբախտաբար, ամուր է եղել եւ չի կոտրվել:
Դոլարի ու եվրոյի վերելքը շարունակվում է: Հունվարի 24-ին դոլարի փոխարժեքը կազմել է 486 դրամ, եվրոյինը՝ 522, ռուբլունը՝ 8 դրամ 22 լումա, ֆունտինը՝ 606 դրամ:
Հունվարի 25-ի գիշերը հանրապետությունում սպասվում է առանց տեղումների եղանակ: Օրվա երեկոյան ժամերից եւ 26-28-ը շրջանների զգալի մասում ձյուն է սպասվում: Օդի ջերմաստիճանը 26-ի գիշերը կբարձրանա 8-10 աստիճանով, այնուհետեւ էապես չի փոխվի: Երեւանում նույնպես վաղը տեղումներ չեն սպասվում: