Հովիկ Աբրահամյանն այսօր ամբողջ օրվա ընթացքում լարված սպասման մեջ պահեց հասարակությանը՝ մինչ աշխատանքային օրվա վերջ չհրապարակելով ՀՀԿ-ից հեռանալու մասին խոստացած հայտարարությունը: Այնքան երկար սպասեցրեց, որ սկսեցին խոսակցություններ պտտվել, թե, գուցե, փոշմանել է: Երեկոյան ժամը 5-ին մոտ վերջապես տարածվեց նրա հայտարարությունը: Հովիկ Աբրահամյանը խոստովանեց. երկար է մտածել, իր կյանքի «կարեւոր ու դժվարին որոշումներից էր»:
«Երկար եմ մտածել այս որոշումը կայացնելիս: Անկեղծ ասեմ՝ հեշտ որոշում չէր ինձ համար, քանի որ կուսակցությանը նվիրել եմ իմ կյանքի մի էական հատված՝ մոտ երկու տասնամյակ»,- հայտարարել է Աբրահամյանը: Հայտարարության մյուս հատվածում՝ ինչպես բոլոր հեռացողների պարագայում. շնորհակալության խոսք կուսակից ընկերներին, նախկին ու ներկա պաշտոնյաներին եւ, իհարկե, հասարակությանը: Նաեւ պատգամ իրենից հետո ՀՀԿ-ում իր տեղը զբաղեցնողին. առնվազն Հովիկ Աբրահամյանի նման հայրենասեր ու պետականամետ լինել:
Կրկին հավաստել է, որ շարունակելու է ակտիվ զբաղվել քաղաքականությամբ, բայց այդպես էլ չի տրվել գլխավոր հարցերի պատասխանը. ինչո՞ւ է հեռացել Հանրապետականից, ո՞ւմ հետ է այսուհետեւ զբաղվելու քաղաքականությամբ: Իսկ մամուլը սեփական վարկածներն է առաջ քաշում: Ասում են՝ Աբրահամյանը պարզապես քավության նոխազ դարձավ. խորհրդարանական ընտրություններին ընդառաջ հասարակական դժգոհությունը մեղմելու նպատակով պարտադրված հրաժարական ներկայացրեց: Ասում են նաեւ, որ Հովիկ Աբրահամյանն ուզում է միանալ «Ծառուկյան դաշինք»-ին, բայց նախկին վարչապետի խնամին հրաժարվում է նրան ներառել իր դաշինքի համամասնական ցուցակում. չի ուզում մտնել Հովիկ Աբրահամյան-Սերժ Սարգսյան հարաբերությունների մեջ: Փոխարենը կարող է նրա որդուն՝ իր փեսա Արգամ Աբրահամյանին իր հետ Ազգային ժողով տանել:
Հանրապետականից Աբրահամյանի հեռանալը նոր կանխատեսումներ է ծնել. ասենք, որ առաջիկա օրերին ՀՀԿ-ն լքելու եւ «Ծառուկյան դաշինք»-ին միանալու մասին կհայտարարեն մի շարք կարկառուն դեմքեր եւս: Նշվում են, մասնավորապես, Մհեր Սեդրակյանի՝ Թոխմախի Մհերի եւ Սյունիքի նախկին մարզպետ Սուրիկ Խաչատրյանի անունները: Խաչատրյանը, սակայն, պնդում է, որ Հանրապետականից հեռանալու մտադրություն չունի. «շառ են անում, ընտրություններին ՀՀԿ-ին է սատարելու»:
Ինչպե՞ս է ստուգվելու պատգամավորի թեկնածուների հայերենի իմացությունը եւ ո՞ւմ է դա վերաբերելու: Կրթության նախարարությունը պարզաբանել է. Հայաստանում կրթություն ստացած անձինք, եթե անգամ նրանք ռուսական դպրոց են ավարտել, լեզվի քննություն չեն հանձնի:
Խոսքն արտերկրում ոչ հայկական դպրոց հաճախածների մասին է: Հայտնի է նաեւ, թե ինչ հարցերի են պատասխանելու պատգամավորի թեկնածուները. ստիպված կլինեն ճիշտ լրացնել բաց թողնված տառերը, նշել բառի ճիշտ արտասանությունն ու բացատրությունը, օրինակ՝ իմանալ անպաճույճ բառի իմաստը կամ նշել, թե ինչպես է արտասանվում, ասենք, չարորակ բառը: Ի դեպ՝ պատգամավորի թեկնածուները նույն իրավունքները կունենան, ինչ բուհերի դիմորդները. թեստավորման արդյունքները, ցանկության դեպքում, եռօրյա ժամկետում կարող են դատարանում բողոքարկել:
Սփյուռքն առավելություն է մեր երկրի համար, իսկ այդ հարաբերությունների կարեւորության մասին կարելի է երկար խոսել: Կարեն Կարապետյանի համոզմունքն է: Մոսկվայում հայ համայնքի հետ հանդիպմանը վարչապետը նաեւ վստահեցրել է. Հայաստանին Սփյուռքից միայն կապիտալի հոսք ու բարեգործություն պետք չէ, նաեւ սովորելու բան ունենք:
Ուզում է, որ նման հանդիպումները հարթակ դառնան՝ կարծիքներ փոխանակելու, գաղափարներ ներկայացնելու համար: Ինքն էլ իր գլխավորած կառավարությամբ ամեն ինչ անելու է, որպեսզի Հայաստանը բոլոր հայերի համար ամենալավ երկիրը դառնա:
Այսօր առավոտյան Հայաստանի պաշտպանության նախարարության զորամասերից մեկի պահպանության դիրքում ժամկետային զինծառայողի դի են հայտնաբերել: Շարքային Շավարշ Գալստյանի ծնոտի շրջանում մահացու հրազենային վնասվածք է եղել: Քրեական գործ է հարուցվել՝ ինքնասպանության հասցնելու հոդվածի հատկանիշներով:
Շավարշ Գալստյանն Աբովյան քաղաքից էր, ամռանը զորացրվելու էր: Նա ընտանիքի միակ զավակն էր, ապրում էր մոր հետ, հայրը մի քանի տարի առաջ է մահացել:
Մեղադրանք զինծառայողին հրազենային վնասվածք հասցնելու համար: Հունվարի 16-ին Արցախում ժամկետային զինծառայող Գուրգեն Սարգսյանին հրազենային վնասվածք հասցրած կրտսեր սերժանտը կալանավորված է:
Գուրգեն Սարգսյանի վիճակը ծայրահեղ ծանր է: Զինվորական հոսպիտալի պետը տեղեկացրել է, որ ծնոտի շրջանում ստացած վիրավորումն անհամատեղելի է կյանքի հետ: Նախնական տվյալներով՝ կրտսեր սերժանտն անզգուշությամբ է կրակել է Գուրգենի վրա, սակայն նրա համագյուղացիները մեր թղթակցի հետ զրույցում ասել են, որ զինծառայողները նախկինում տարաձայնություններ են ունեցել:
Արտակարգ պատահարներ հանրապետությունում: Երեւանում Դավիթաշենի շենքերից մեկի բնակարանում տղամարդու դի են հայտնաբերել: Հարեւանները պայթյունի ձայն են լսել. տանը պայթյունի հետքեր են եղել՝ պատուհանի կոտրված ապակիներ, վնասված գույք: Ավելի ուշ պարզվել է, որ մահացածը 62-ամյա Ռազմիկ Ֆարաշյանն է: Նա արցախյան ազատամարտի մասնակից է, կամավոր առաջնագիծ էր մեկնել նաեւ ապրիլյան պատերազմի օրերին:
Իսկ Արմավիրի մարզում գիշերը ողբերգական ավտովթար է տեղի ունեցել: Երեւան-Արմավիր ավտոճանապարհին BMW մակնիշի մեքենան դուրս է եկել ճանապարհի երթեւեկելի գոտուց եւ բախվել թունաքիմիկատների խանութի պատին: Պատահարի հետեւանքով վարորդը՝ 25-ամյա Սահակ Համբարձումյանը, տեղում մահացել է:
Ազգային անվտանգության ծառայությունը զգուշացնում է. շրջանառության մեջ 10.000 դրամանոց կեղծ թղթադրամներ են հայտնվել: Գունավոր պատճենահանման եղանակով այն տպագրել են, իսկ իրականին առավել նմանեցնելու նպատակով 1.000 դրամանոցից կտրված պաշտպանիչ ժապավենաձեւ փայլաթիթեղներ են փակցրել: Կեղծ դրամները հիմնականում իրացրել են մարզերի բենզալցակայաններում, գիշերային ուշ ժամերին եւ վատ լուսավորության պայմաններում: Հարուցված քրեական գործով արդեն մեղադրյալ կա: Դրամանենգությունից տուժածները կարող են ՀՀ ԱԱԾ քննչական վարչություն դիմել:
Երկարատեւ վերելքից հետո դոլարի փոխարժեքը փոքր-ինչ նվազել է, իսկ եվրոն շարունակում է թանկանալ: Արդյունքում հունվարի 25-ին դոլարի փոխարժեքը կազմել է 486 դրամ, եվրոյինը՝ 522, ռուբլունը՝ 8 դրամ 19 լումա, ֆունտինը՝ 612 դրամ:
Հունվարի 26-ին հանրապետության շրջանների մեծ մասում ձյուն է սպասվում, լեռնային շրջաններում՝ բուք: Օդի ջերմաստիճանը, սակայն, հունվարի 26-ի գիշերը կբարձրանա 8-10 աստիճանով: Երեւանում նույնպես վաղը տեղումներ կլինեն:
