Հովիկ Աբրահամյանի որոշումն է եղել դուրս գալ Հայաստանի Հանրապետական կուսակցությունից: Այս մասին այսօր` հունվարի 26-ին, կուսակցության գործադիր մարմնի եւ խորհրդի նիստերից հետո լրագրողների հետ ճեպազրույցում ասաց ՀՀԿ մամուլի խոսնակ, Ազգային ժողովի փոխնախագահ Էդուարդ Շարմազանովը:
«Յուրաքանչյուր քաղաքական գործիչ իրավունք ունի մնալ Հայաստանի Հանրապետական կուսակցությունում կամ չմնալ: Դրանից թուլացա՞վ ՀՀԿ-ն, իհարկե ոչ, Հանրապետականն ավելի վճռակա՞ն է, կարծում եմ` այո»,- ասաց նա:
Շարմազանովի խոսքով` ինքն ընթերցել է նախկին վարչապետի ֆեյսբուքյան գրառումը, սակայն այնտեղ քաղաքական դրդապատճառ չի գտել: ՀՀԿ մամուլի խոսնակը կարծում է, որ քաղաքական գործիչը պետք է առաջնորդվի քաղաքական հիմնավորումներով, որը, սակայն, ինքը Աբրահամյանի գրառման մեջ չի տեսել:
Հարցին` սպասելի էր իր համար Հովիկ Աբրահամյանի նման քայլը, Շարմազանովը չցանկացավ այդ մասին խոսել, այլ խոսեց փիլիսոփայությունից. «Քաղաքականության մեջ ոչինչ բացառված չէ, քաղաքականությունը հնարավորի արվեստ է եւ քաղաքականության մեջ ոչինչ չպետք է բացառել, ամեն ինչ հնարավոր է: Հովիկ Աբրահամյանը ֆեյսբուքյան էջում այդ մասին գրել է, դուք հետագայում կարող եք ձեր հարցերն ուղղել նրան: Բոլոր այն անձինք, սկսած ինձնից, որոնք գալիս են քաղաքականություն, որ պաշտոն ստանան, վայելք լինի, պետք է այլ կուսակցություն ընտրեն, ՀՀԿ-ի համար անձեր չկան, կա քաղաքական թիմ, ծրագիր, գաղափարախոսություն եւ թիմը կորոշի` ով որտեղ կլինի: Օրինակ, ֆուտբոլի ժամանակ կա գլխավոր մարզիչ, բոլոր 11-ն էլ ասենք` ուզում են խաղալ կենտրոնական հարձակվողի դերում, բայց եթե բոլորը կենտրոնական հարձակվող լինեն, դարպասդ բաց է մնում եւ դու 10:0 պարտվում ես, այսինքն պետք է լինի մարզիչ կամ առաջնորդ, որը պետք է ընտրի ում ծառայությունները, հնարավորությունները որտեղ օգտագործի»: