Ռուսական սպառազինման մատակարարումների մասին համաձայնագիրը իրականացվում է գրաֆիկին համապատասխան։ Այս մասին հայտնել է Հայաստանի պաշտպանության նախարար Վիգեն Սարգսյանը հունվարի 27-ի մամուլի ասուլիսի ժամանակ։
Նրա խոսքով, անցած տարվա ընթացքում առաջնագիծը համալրվել է տեխնիկայով, դիտարկման՝ այդ թվում գիշերային տեսանելիության ու կրակ վարելու համակարգերով։ Սպառազինման մատակարարումների վերաբերյալ Ռուսաստանի հետ համաձայնագրի իրականացումը որոշակիացնելու խնդրանքին Վիգեն Սարգսյանը պատասխանել է, որ չի կարող որեւէ բան հայտնել սպառազինման տեսակների մասին, քանի որ դա գաղտնի տեղեկատվություն է։ «Կարող եմ միայն ասել, որ մի մասն արդեն փոխանցվել է Հայաստանի ԶՈՒ-երին։ Մնացածը կատարվում է գրաֆիկի համապատասխան, ու մենք հետամուտ ենք, որ շուտ ստանանք այդ սպառազինումը, որը էլ ավելի կբարձրացնի մեր բանակի մարտունակությունը»,- նշել է նախարարը։ Նրա խոսքով, ծրագիրը շարունակելու մասին բանակցությունները կշարունակվեն, ու ռուսական շուկայից բացի Հայաստանը իր ունեցած կարիքները բավարարելու հնարավորություններ է փնտրում նաեւ այլ շուկաներում։
Պատասխանելով բանակի մարտունակության մասին հարցին՝ նախարարը շեշտեց, որ անկասկած, եւ անցած տարվա ապրիլի իրադարձությունները հաստատում են դա, հայկական ԶՈՒ-երը շատ մարտունակ են, պրոֆեսիոնալ, համալրված հարուստ ռազմական փորձ ունեցող զինծառայողներով։ «Խնդիրն այլ է։ Պետք է կարողանալ լուծել ռազմավարական ու մարտավարական խնդիրներ։ Պետք է առաջ նայել, ու ԶՈՒ-երը պետք է ավելի արագ զարգանան, քան իրավիճակը»,- նշեց նախարարը։