Նախընտրական գործընթացների մեկնարկից ի վեր առաջին անգամ Սերժ Սարգսյանը խոսել է եւ անդրադարձել ներքաղաքական ամենասուր հարցադրումներին: Նախընտրական դաշինքների ձեւավորումը նախագահի սրտով է, հենց դրան էր ձգտում, երբ նախաձեռնում էր Սահմանադրական բարեփոխումներ եւ խոսում կուսակցությունների խոշորացումից: Ձեւավորվող բոլոր դաշինքների եւ ուժերի հետ ՀՀԿ-ն պատրաստ է նստել մի սեղանի շուրջ` քննարկելու այսօր հասարակությանը հուզող ամենազգայուն խնդիրներից մեկը` արժե արդյոք տեղափոխել ընտրությունների օրը` հաշվի առնելով, որ ապրիլի 2-ը քառօրյա պատերազմի զոհերի հիշատակի օրն է: Սերժ Սարգսյանը ասել է` ինքը դեմ չէ 4-5 օրով հետաձգելու ընտրությունները: Գագիկ Ծառուկյանի մասին. Սերժ Սարգսյանը վստահեցրել է` նրա վերադարձն իր սրտով չի եղել: Նեղացողների մասին. Սերժ Սարգսյանն ասել է` Հանրապետականներից ով որտեղ կաշխատի, որոշում են` կախված իրենց ծրագրերից եւ մարտահրավերներից, պատգամավորի թեկնածու առաջադրելիս կամ պաշտոնների նշանակելիս` հաշվի են առնում ոչ թե անձերի հավակնությունները, այլ նրանց ունակությունները: ՀՀԿ-ից հեռացողների մասին. Սերժ Սարգսյանն ասել է` մեկ-երկու մարդու գնալն արտահոսք չէ, անհեթեթ խոսակցություններ են: Այնուամենայնիվ, նախագահը հեռացողների մասին խոսել է, համեմատել է նրանց մայր գետից պոկվող, հետո չորացող առվակների հետ:

Չնայած Սերժ Սարգսյանը առվակների մասին խոսելիս անուններ չէր տվել, Հովիկ Աբրահամյանը հասկացել է, որ խոսքն առաջին հերթին իր մասին է: Այսօր նա իր ֆեյսբուքյան էջում նախագահի փոխաբերությանը պատասխանել է սեփական փոխաբերությամբ, որում ակնարկել է, որ իր էջը փակված համարելու համար դեռ շուտ է։ «Գետերի եւ առվակների փոխաբերությունը լավն էր: Ինքս էլ հավանել եմ: Չմոռանանք նաեւ, որ մայր գետերը ոչ այլ ինչ են, քան ինքնամոռաց առվակների միավորում: Բայց ինչ-որ պահից գետ լցվող տեխնոլոգիական գործարանի խառնուրդային ջրերը կմխտռեն ողջ մայր հունը, անպիտան կդառնա ամբողջը: Միգուցե մինչ այդ պոկված՝ դեռ սեփական հողի հոտը կրող առվակները, մինչեւ ոչնչանալը, հասցնե՞ն գոնե մեկ-երկու բնակավայրի կյանք պարգեւել»,- գրել է նախկին վարչապետը:

Հովիկ Աբրահամյանին արձագանքելու գործը ստանձնել է Էդուարդ Շարմազանովը: Նա նախկին կուսակցին խորհուրդ է տվել` չարժե նախագահի հետ ակնարկներով խոսել, դա հենց Հովիկ Աբրահամյանի շահերից է բխում: «Կարդացի պարոն Աբրահամյանի գրառումը, լավը չէր, չհավանեցի, շատ էր արհեստական: Հատկապես առվակների ինքնազոհությունը հանուն մի երկու բնակավայրերի փրկության` «սպանիչ» էր: Հաստատ գիտեք, որ առվակներից բացի բնության մեջ  կան  նաեւ ստորգետնյա ջրեր, արտեզյան հորեր, որոնք  դժվար թե նպաստեն այդ մի քանի բնակավայրերի փրկությանը: Եվ վերջում պարոն Աբրահամյանին մի բարեկամական հորդոր. չեմ կարծում, որ ՀՀԿ նախագահի հետ ակնարկներով խոսելը շահեկան է»,- ասել է Շարմազանովը:

Արդյոք սա նշանակում է, որ Հովիկ Աբրահամյանը դառնում է ընդդիմություն եւ այս խորհրդարանական ընտրություններին ականատես կլինենք նախկին եւ ներկա ՀՀԿ-ականների դիմակայության, ցույց կտա ժամանակը: Այս պահին խոսակցություններ կան, որ Հովիկ Աբրահամյանը կարող է միանալ Օսկանյան- Օհանյան դաշինքին կամ իր խնամի Գագիկ Ծառուկյանին: Արդեն երկար ժամանակ է` ասում են` Ծառուկյանը դեմ է, որ ժամանակին իր մասին հրապարակային կոշտ հայտարարություններ արած խնամին իր դաշինքին: Ինչ վերաբերում է Վարդան Օսկանյանին, նա չի բացառում համագործակցությունը ցանկացած ուժի կամ անձի հետ, այդ թվում Հովիկ Աբրահամյանի:

Եթե ոչ լայն արտահոսք, ապա գոնե մի քանի կարկառուն Հանրապետականներ այնուամենայնիվ կլքեն կուսակցությունը: Իսկ առաջին թեկնածուն Մհեր Սեդրակյանն է` «Թոխմախի Մհերը»: Նա էլ Հովիկ Աբրահամյանի նման մինչեւ հիմա համարվում էր Հանրապետականների օգտին գլխավոր ձայն բերողներից մեկը: Տեղեկություններ կան, որ արդեն առաջիկա ժամերին նա կհայտարարի կուսակցությունից հեռանալու մասին: Ի դեպ, նրա մերձավոր պաշտոնյաներն արդեն հավաքում են ճամպրուկները. այսօր Մհեր Սեդրակյանի փեսան` Արմեն Հարությունյանը, ազատվել է Էրեբունի համայնքի ղեկավարի պաշտոնից:

Դժբախտ պատահար է տեղի ունեցել հայկական բանակում: Զորամասի շարահրապարակում ժամկետային զինծառայողի ինքնազգացողությունը վատացել է, մեկ ժամ անց նա մահացել է զորամասի բուժկետում: 18-ամյա Սարգիս Ափինյանը բանակ էր զորակոչվել ընդամենը 10 օր առաջ, նա Արմավիրի մարզի Մյասնիկյան գյուղից էր, ընտանիքի կրտսեր զավակը: Նախնական տվյալով, նա մահացել է սուր սրտային անբավարարությունից, ունեցել է թոքային այտուց: Քննությունը կպարզի` ինչ հանգամանքներում է տեղի ունեցել ողբերգությունը, արդյոք երիտասարդը բանակ է զորակոչվել առողջական խնդիրներով:

Վերջին 3 օրում սա երկրորդ դեպքն է, որ հայկական բանակում զինծառայող է մահանում խաղաղ պայմաններում: 19-ամյա Շավարշ Գալստյանին, որին նախնական վարկածով ինքնասպանության էին հասցրել, հուղարկավորեցին այսօր: Պաշտպանության նախարար Վիգեն Սարգսյանը վստահեցրել է` հետեւողական է լինելու բոլոր միջադեպերի հարցում, միաժամանակ շարունակում են մեծացնել բանակի մարտունակությունը, դրա կարեւոր բաղադրիչը ռուսական 200 միլիոն վարկով մատակարարվող սպառազինություններն են: Վիգեն Սարգսյանը վստահեցրել է` մատակարարումները կատարվում են գրաֆիկին համապատասխան` գաղտնիությունից ելնելով չմանրամասներով կոնկրետ, թե ինչ զինատեսակների մասին է խոսքը: Մինչ այդ բարձրացնում են զինվորի հանդերձանքի որակը: Կոշիկների մասով արդեն լուրջ հաջողության են հասել՝ բնական կաշվի մասն ավելացրել են։ Բայց հայկական որակյալ կոշիկները կարող են ոչ միայն ծառայել հայ զինվորին, այլեւ միջազգային շուկաներ նվաճել: Վիգեն Սարգսյանը մտադիր է միջազգային բրենդ դարձնել դրանք:Բանակի խնդիրները զբաղեցնում են պաշտպանության նախարարի ամբողջ ժամանակը, այս առիթով Վիգեն Սարգսյանը կատակել է՝ միայն վարսավիրանոց է հասցնում գնալ։ Այնուամենայնիվ, քաղաքականությամբ զբաղվելու ժամանակ նախարարը կգտնի:

«Մոսկվա» կինոթատրոնում այսօր տեղի է ունեցել մեծ աղմուկ հանած «Կյանք ու կռիվ» ֆիլմի 2-րդ մասի պրեմիերան: Ֆիլմը պատմում է հերոսների մասին 25 տարի անց, երբ նրանց կյանքը կրկին բեկվում է այս անգամ ապրիլյան պատերազմի պատճառով: Ֆիլմը նվիրված է Հայոց բանակի կազմավորման 25-ամյակին, պրեմիերային ներկա էին Հանրապետության նախագահ Սերժ Սարգսյանն ու պաշտպանության նախարար Վիգեն Սարգսյանը:

Հայ կնոջ եւ նրա սեւամորթ ամուսնու ընտանեկան լուսանկարի շուրջ մեծ աղմուկը հասել է նաեւ Եվրամիության դեսպանին: Կրթության նախարար Լեւոն Մկրտչյանի հետ հանդիպմանը Պյոտր Սվիտալսկին մտահոգություն է հայտնել, որ լուսանկարի վերաբերյալ ռասիստական մեկնաբանություններից մեկը ֆեյսբուքում գրել է դպրոցի ուսուցիչը: Նախարարը տեղեկացրել է, որ այդ ուսուցչի մանկավարժական գործունեությունն ուսումնասիրելու եւ անհրաժեշտության դեպքում նրան կարգապահական տույժի ենթարկելու համար քաղաքապետարանում ստեղծվել է հատուկ աշխատանքային խումբ:

Հանրապետության շրջանների մեծ մասում սպասվում է ձյուն: Մինչեւ հունվարի 31-ն օդի ջերմաստիճանը կնվազի 4-6 աստիճանով: Երեւանում նույնպես վաղը ձյուն է տեղալու: Մայրաքաղաքում գիշերը կդիտվի -5-7, իսկ վաղը ցերեկը՝ -2-4 աստիճան ցուրտ:

Դոլարը, եվրոն ու ռուբլին էժանացել են: Հունվարի 27-ին դոլարի փոխարժեքը կազմել է 486 դրամ, եվրոյինը` 520, ռուբլունը` 8.10 դրամ, իսկ ֆունտինը` 610 դրամ: