Պլատինին ու Բլատերը հեռացան, բայց նրանց հեղափոխական, նորարարական մտքերը դեռ շարունակում են  իրագործվել: Շատ քննարկվեց՝ արդյոք Եվրո 2016-ի փոխված ձեւաչափը արդացրե՞ց իրեն, թե՞ ոչ: Հիմա էլ պարզ դարձավ, որ  առաջին անգամ Եվրոպայում կանցկացվի Ազգերի լիգան: Ի՞նչ է դա իրենից ներկայացնում:

Ազգերի լիգան անցկացվելու է երկու տարին մեկ՝ կենտ թթ-ին: 55 թիմեր բաժանվելու են չորս դիվիզիոնների: A դիվիզիոնում լինելու են UEFA-ի վարկանիշով 12 լավագույն հավաքականները, B-ում մյուս 12,  հետո C-ում եւ վերջում ամենաթույլ 16 թիմերը հայտնվելու են D դիվիզիոնում:

Թիմերի կբաժանվեն խմբերի: Հաղթողը կլինի A դիվիզիոնից: Մյուս դիվիզիոնների հաղթողները Ազգերի լիգայի հաջորդ մրցաշարում կհայտնվեն ավելի բարձր դիվիզիոնում, իսկ վերջին տեղեր զբաղեցրածները՝ ցածր, բացի D դիվիզիոնից:

Եվրո 2020-ի նախընտրական փուլը կսկսվի 2019-ի գարնանը: 10 խմբերի լավագույն 2 թիմերը դուրս կգան Եվրո: Այլեւս չի լինի երրորդ՝ անցումային տեղ: Իսկ այժմ ուշադիր… մյուս 4 թիմերը, որոնք պետք է մասնակցեն Եվրոյին, կլինեն բոլոր դիվիզիոնների հաղթողները: Շատ հնարավոր է, որ A  դիվիզոնի հաղթողն արդեն իր տեղը Եվրոյի նվաճած լինի ընտրական փուլից: Տրամաբանական է նաեւ, որ A դիվիզիոնի բոլոր թիմերը ընտրական փուլից դուրս գան Եվրո, այդ դեպքում այդ տեղը բաժին կհասնի B դիզիոնի թիմին:

Մրցաշարի առավելություններ

Ազգերի լիգայի շնորհիվ գրեթե կվերանան ընկերական հանդիպումները: Շատ ընկերական հանդիպումներ անցնում են են առանց դրամատիկ պայքարի: Պարզապես թիմերն իրենց համար սպարինգ զույգ են գտնում եւ մարզվում: Ազգերի լիգայի խաղերը կլինեն ավելի թեժ, քանի որ կխաղան ուժերով հավասար թիմեր:  Ուժեղագույները միմյանց հետ կչափեն ուժերը, իսկ թույլ թիմերը ստիպված չեն լինի խայտառակություն ապրել, ինչպես դա հաճախ լինում է նախըտրական փուլում թույլ թիմերի հետ:

Թույլ թիմերը դիվիզիոնում հաղթելիս՝ հնարավորություն կստանան հանդես գալ Եվրոպայի առաջնությանը, որը նրանց դժվար հաջողվեր ընտրական փուլում:

Կան նաեւ բացասական կողմեր

Ընկերական հանդիպումներին ֆուտբոլային ֆեդերացիաները հիմնականում գումար են աշխատում: Ստացվում է, որ նրանք կզրկվեն դրանից: Հասույթը կգնա UEFA:

Շատ հնարավոր է, որ չափից դուրս ծանրաբեռնված լինելու պատճառով, շատ թիմեր, այս մրցաշարում չխաղացնեն  առաջատար խաղացողների, քանի որ Եվրո դուրս գալն ավելի հեշտ է նախընտրական փուլով:

Սա ինչ-որ տեղ կնվազեցնի Աշխարհի առաջնության  հանդեպ հետաքրքրությունը: Մեկ տարվա մեջ Եվրոպայի երկու ընտրական մրցաշար, հետո Եվրոպայի առաջնություն….

Ինչ վերաբերում է Հայաստանին…

Այս պահին մենք գտնվում ենք վերջին՝ D դիվիզիոնում հետեւյալ հավաքականների հետ՝ Էստոնիա, Բելառուս, Վրաստան, Լատվիա, Ֆարերներ, Ղազախստան, Մոլդովա, Լյուքսեմբուրգ, Մակեդոնիա, Կոսովո, Լիխտենշտեյն, Մալթա, Սան-Մարինո, Ջիբրալթար:

Մի կողմից, իհարկե, ցավալի է, որ ամենաթույլ թիմերի հետ ենք հայտնվել, բայց եթե հպարտությունը մի կողմ դնենք, սա շատ լավ հնարավորություն է այս դիվիզիոնում հաղթելու եւ մեկնելու Եվրոյին:

Վերջնական թիմերը կդասավորվեն ըստ դիվիզիոնների այս տարվա նոյեմբերին, երբ կավարտվի ԱԱ-ն ընտրական փուլը: Ստացվում է, որ մենք լավ կանենք չբերելավենք մեր վարկանիշը,  որպեսզի խաղանք թույլ թիմերի հետ:

Ժամանակին կար Ազգերի լիգա` ՄԱԿ-ին նախորդող միջազգային կազմակերպությունը, որին մասնակցում էի 58 երկրներ: Այդ կազմակերպությունը երկար կյանք չունեցավ:

Թե որքանով հաջողված կլինի եւ որքան կապրի Ֆուտբոլային Ազգերի լիգան, ցույց կտա ժամանակը:

Վերա Մարտիրոսյան