Որոշումն այն մասին, որ ՀԱՊԿ հաջորդ գլխավոր քարտուղարը պետք է Հայաստանի ներկայացուցիչը լինի, կազմակերպության մասնակից երկրների ընդհանուր որոշումն է։ Այս մասին հայտնել է Հայաստանի արտգործնախարար Էդվարդ Նալբանդյանը հունվարի 31-ի մամուլի ասուլիսի ժամանակ՝ ամփոփելով 2016-ի արդյունքները։
Նրա խոսքով, վերջերս ՀԱՊԿ քարտուղարությունը նիստ է անցկացրել ու որոշում կայացրել այս հարցի շուրջ։ Որոշման նախագիծն ուղարկվել է մասնակից երկրների ԱԳՆ-ներին հաստատման համար։ Այն ներկայացվելու է ՀԱՊԿ հաջորդ գագաթնաժողովի ժամանակ։ Գագաթնաժողովի անցկացման ժամկետները կորոշվեն մոտ ժամանակներս։
Հիշեցնենք, որ Հայաստանի ներկայացուցիչը պետք է հաստատվեր Երեւանում 2016-ի հոկտեմբերին անցկացված գագաթնաժողովի ժամանակ։ Սակայն Ղազախստանի նախագահի բացակայության պատճառով որոշումը չի կայացվել։ Նույնատիպ իրավիճակ էլ Մոսկվայի գագաթնաժողովում էր ստեղծվել ՝դեկտեմբերին։