Ֆեյսբուքում երեկվանից մեծ աղմուկ էր բարձրացրել Սերժ Սարգսյանի անունով բացված էջը: Նախագահի մամուլի քարտուղարը այսօր ասել է՝ կեղծ էջ է եղել, բացվելուց մի քանի ժամ անց իրենք դիմել են «Ֆեյսբուքի» գրասենյակ, որը փակել է ֆեյք էջը: Սերժ Սարգսյանը մինչեւ հիմա ֆեյսբուքյան էջ ունենալու անհրաժեշտություն չի ունեցել եւ առաջիկայում էլ, ըստ խոսնակի, հազիվ թե նման ցանկություն ունենա:
Հովիկ Աբրահամյանի յուրայինները շարունակում են լքել Հանրապետական կուսակցությունը: Այսօր կուսակցությունից դուրս գալու դիմում է գրել միանգամից 13 հանրապետական՝ Արարատի մարզից: Նրանց թվում են Հովիկ Աբրահամյանի եղբայրը եւ վերջերս պաշտոնից հեռացած՝ Արարատի մարզպետը։ Հովիկ Աբրահամյանի ազգական, պատգամավոր Կարինե Պողոսյանը նույնպես կուսակցությունից դուրս գալու դիմում է ներկայացրել, թեեւ ընդամենը մեկ շաբաթ առաջ տեսախցիկների առջեւ վստահեցնում էր, որ նման մտադրություն չունի:
«Ծառուկյան» դաշինքի ցուցակի առաջին տասնյակը գրեթե պատրաստ է: NEWS.am-ի տեղեկություններով, երկրորդ հորիզոնականում գործարար Խաչատուր Սուքիասյանն է, երրորդում` Վերահսկիչ պալատի նախագահ Իշխան Զաքարյանը: Խնդիր է առաջացել պատգամավորների կին թեկնածուների հարցում: Խնդիրն այն է, որ ըստ Ընտրական օրենսգրքի, ցուցակի յուրաքանչյուր հնգյակում առնվազն մեկ կին թեկնածու պետք է լինի: Ասում են` առաջինի հարցում Ծառուկյանը վաղուց կողմնորոշվել է. Նաիրա Զոհրաբյանը 4-րդ հորիզոնականում է, իսկ ահա երկրորդ կին թեկնածուի շուրջ անհամաձայնություն կար: Այսօր արդեն հայտնի դարձավ, որ ամենայն հավանականությամբ, երկրորդ հնգյակում կլինի Ծառուկյանի մամուլի քարտուղար Իվետա Տոնոյանը:
Թեեւ առաջադրումները սկսվելու են փետրվարի 6-ից, բայց արդեն ակնհայտ է, որ ընտրական տարածքներում թեժ պայքար է ծավալվելու տարածքային ցուցակներով առաջադրվող թեկնածուների միջեւ: Ինչպես միշտ, Շիրակի մարզը դիտարժան մրցապայքար է խոստանում: Իրար դեմ են դուրս գալու վաղեմի հակառակորդներ Վարդան Ղուկասյանը եւ Մարտուն Գրիգորյանը, առաջինն առաջադրվելու է ԲՀԿ-ի, երկրորդը` ՀՀԿ-ի տարածքային ցուցակով: Սա արդեն նշանակում է, որ Գյումրիում ընտրությունները խաղաղ չեն անցնի: Նախորդ ընտրությունների ժամանակ այս երկուսի մրցապայքարն ուղեկցվեց արյունալի միջադեպով:
Ոչ պակաս թեժ է լինելու նաեւ մայրաքաղաքի ընտրական տարածքներում, որտեղ նույն քաղաքական ուժի տարածքային ցուցակով առաջադրվող թեկնածուները մրցելու են միմյանց հետ մյուսներից ավելի շատ ձայն բերելու եւ մանդատ ստանալու համար:
Մինչ մյուս ընտրական տարածքներում դեռ հստակեցվում է թեկնածուների ցանկը, ԴԱՀԿ նախկին ղեկավար Միհրան Պողոսյանն արդեն գործի է անցել Քանաքեռ- Զեյթունում: Ըստ մամուլի տեղեկությունների` թաղապետարանի աշխատակիցներին արդեն սպառնում են, որ նրան ձայն չտալու դեպքում կհեռացնեն աշխատանքից: Ի դեպ, այսօր «Թրանսփարենսի Ինթերնեյշնլ»-ը տարածել է հայտարարություն, որում անթույլատրելի է անվանել Միհրան Պողոսյանի նկատմամբ օֆշորային սկանդալի հետ կապված գործը կարճելը:
Հայաստանում ԱՄՆ դեսպան Ռիչարդ Միլսը ելույթ է ունեցել Հայ-ամերիկյան առեւտրային պալատում եւ անդրադարձել 2016-ին Հայաստանի համար կարեւորագույն մի քանի իրադարձությունների: Խոսելով ապրիլյան պատերազմի մասին, դեսպանը ասել է, որ պատերազմից հետո ի հայտ եկած հանրային տրամադրությունները ցույց տվեցին, որ Հայաստանում կոռուպցիան սպառնալիք կարող է լինել Հայաստանի ազգային անվտանգության համար: Եթե Հայաստանի կառավարությունը կոռուպցիան արմատախիլ անելու քայլեր չձեռնարկի, իրական փոփոխություն Հայաստանում չի լինի: Դեսպան Միլսն անդրարդարձել է նաեւ «Սասնա ծռերի» կողմից ոստիկանության ՊՊԾ գնդի գրավմանը: Նրա կարծիքով, իշխանությունները բավարար քայլեր չեն ձեռնարկել այդ օրերին անզեն ցուցարարների եւ լրագրողների հանդեպ անհամաչափ ուժ կիրառած ոստիկանների հանդեպ:
Փետրվարի 1-ից Հայաստանի բնակիչների համար էլեկտրաէներգիան էժանանում է: Տարբերությունը մեծ չէ, ընդամենը 1.22 դրամ: Այսպիսով՝ բնակիչների համար ցերեկային սակագինը կլինի 44.98 դրամ, գիշերային՝ 34.98 դրամ: Սոցիալապես անապահով ընտանիքների համար սահմանվել է ցերեկը՝ 40, իսկ գիշերը 30 դրամ սակագին:
Ապրիլյան պատերազմը կոռուպցիոն նոր ռիսկեր է առաջացրել։ Բանն այն է, որ մի շարք զինծառայողներ բողոքում են, որ իրենց զինծառայության գրքույկներից հեռացրել են ապրիլյան պատերազմին մասնակցելու մասին նշումը: Արցախի պաշտպանության բանակը դա բացատրում է զորամասերի աշխատակիցների անփութությամբ: Մինչդեռ զինծառայողները կարծում են, որ սա դիտավորյալ է արվում, որպեսզի իրենք չկարողանան օգտվել ռազմական գործողություններին մասնակցածների արտոնություններից: Նշենք, որ վիճահարույց գրքույկներում պատերազմին մասնակցության մասին նշումը ջնջված է սպիտակ ներկով:
Չնայած տրանսպորտի նախարարն ամեն առիթով վստահեցնում է, որ Հայաստանում մարզային բոլոր ճանապարհները ժամանակին մաքրվում են ձնից, քաղաքացիները շարունակում են տուժել փակ ճանապարհների պատճառով: Նախարարության «լավ» աշխատանքի հերթական զոհը լոռեցի 13-ամյա Արտյուշ Գրիգորյանն է. նա այսօր դպրոցում ընկել է, կոտրել ձեռքը: Ծնողները փորձել են նրան շտապ հասցնել Սպիտակի հյուրանոց, սակայն, ճանապարհի անանցանելիության պատճառով մեքենան հայտնվել է խցանման մեջ եւ 13-ամյա տղան ստիպված է եղել մի քանի ժամ անտանելի ցավերով սպասել մինչեւ փրկարարները կբացեին ճանապարհը: Ավելի ուշ պարզվել է, որ օգնությունը ուշացել է այն պատճառով, որ ձնամաքրման մեքենան փչացած է եղել:
Երեւանի քաղաքապետարանը ձնամաքրման աշխատանքներում իր թերացումը կոմպենսացնելու հնարամիտ տարբերակ է գտել: Քանի դեռ ի վիճակի չեն ձյունն ամբողջությամբ մաքրել փողոցներից, կարմիր գծերի տուրքը չվճարող վարորդներին չեն տուգանի, քանի որ ձնածածկ փողոցներում կարմիր գծերը վարորդների համար անտեսանելի են: Այս քայլով քաղաքապետարանի աշխատանքից դժգոհ քաղաքացիների բանակից գոնե կբացառեն դժգոհող վարորդներին:
Շրջանառությունից հանվել է «Անտիգրիպին» դեղը: Խոսքը միայն երիցուկի համով դեղափոշու մասին է: Այս կապակցությամբ առողջապահության նախարարությունն այս դեղամիջոցը ներմուծող ընկերությանը պարտավորեցրել է Հայաստանի բոլոր դեղատներից դուրս բերել այս դեղի խմբաքանակը:
2016թ.-ին Հայաստանում ծնելիությունը նվազել է մոտ 3 տոկոսով: Ազգային վիճակագրական ծառայության տվյալներով` մեր երկրում անցած տարի ծնվել է 40 հազար 638 երեխա, յուրաքանչյուր 112 տղայի դիմաց 100 աղջիկ: Նորածիններին տրվող անուններից առաջատար են տղաների համար Դավիթը, Նարեկը եւ Ալեքսը, աղջիկների համար` Մարիան, Նորեն եւ Մանեն: Ծնելիության ամենացածր ցուցանիշը Սյունիքի եւ Տավուշի մարզերում է: Մահացության ամենաբարձր աստիճանը Լոռու մարզում է: Ամուսնալուծությունների թիվը ամուսնությունների թվի հետ համեմատ ավելացել է: 2015թ.-ի համեմատ Հայաստանի բանկչության թիվը կրճատվել է 12 հազար 100-ով:
Երեւանում տղամարդն օրը ցերեկով առանց դժվարության, չլինելով նույնիսկ զինված, հափշտակել է դեղատան գումարը: Տեսախցիկը ֆիքսել է ինչպես է գլխարկով տղամարդն հանգիստ մոտենում վաճառասեղանի հետեւում կանգնած աշխատակցին, մի կողմ հրում նրան, վերցնում դրամարկղը եւ հանգիստ հեռանում: Վաճառաողուհին փորձում է թեթեւ դիմադրություն ցույց տալ, սակայն, ապարդյուն: Քննչական կոմիտեն խնդրել է տեսանյութում պատկերված տղամարդուն ճանաչողներին հայտնել իրավապահներին:
«Կարմիր խնձորի» հին հայկական ավանդույթը հաջողություն է բերել հայ եւ վրացի երիտասարդ ստեղծագործողներին: Վրացի ռեժիսոր Գեորգի Սիխարուլիձեն եւ սցենարիստ Օֆելյա Հարությունյանը համատեղ Հայաստանում նկարահանել են կարճամետրաժ ֆիլմ «Կարմիր խնձորներ» անունով: Այն պատմում է նորաստեղծ ընտանիքի դրամայի մասին, որտեղ ամուսնական առաջին գիշերից հետո սկանդալ է բռնկվում հարսի, փեսայի եւ սկեսրայրի միջեւ: Ֆիլմը մտել է Ֆրանսիայի հեղինակավոր Կլերմոն- Ֆերանեում անցկացվող կարճամետրաժ կինոյի միջազգային փառատոնի մրցութային ծրագիր:
Դոլարը մի փոքր էժանացել է, եվրոն եւ ֆունտը՝ կտրուկ թանկացել: Փետրվարի 1-ին դոլարի փոխարժեքը կազմել է 485, եվրոյաինը՝ 524, ֆունտինը՝ 612 դրամ: Ռուսական ռուբլու փոխարժեքն աննշան նվազել է՝ կազմելով 8.06 դրամ:
Փետրվարի 2-3-ը Հայաստանում օդի ջերմաստիճանը կնվազի 10-15 աստիճանով, իսկ 5-6-ը՝ կբարձրանա 5-6 աստիճանով: Երեւանում վաղը սպասվումէ առանց տեղումների եղանակ, մայրաքաղաքի բարձրադիր գոտիներում գիշերը ջերմաստիճանը կնվազի մինչեւ -15, ցածրադիր գոտիներում՝ մինչեւ -20, ցերեկը՝ մինչեւ - 6 աստիճան: