Լեռնային Ղարաբաղի Հանրապետության իրավապահ մարմինների կողմից ձերբակալված Ադրբեջանի քաղաքացի Էլնուր Հուսեյնզադեի իրավունքների պահպանման հարցը կլինի ԼՂՀ օմբուդսմենի ուշադրության կենտրոնում։ Այս մասին NEWS.am –ի հետ զրույցում ասել է ԼՂՀ ՄԻՊ Ռուբեն Մելիքյանը։
Ավելի վաղ հայտնել էինք, որ այսօր Ռուբեն Մելիքյանն այցելել է ձերբակալված Է. Հուսեյնզադեին։
«Ձերբակալվածի իրավունքների պահպանման հարցը մեր ուշադրության կենտրոնում կլինի ու որեւէ անբարենպաստ հանգամանքի բացահայտման դեպքում մենք անհապաղ կարձագանքենք»,- շեշտել է Ռուբեն Մելիքյանը։
ՊԱտասխանելով այն հարցին, թե հանդիպման ընթացքում սեղանին ինչ գրքույկ է դրված՝ ԼՂՀ օմբուդսմենը պարզաբանել է, որ ձերբակալվածին, իրավունքների բանավոր բացատրությունից բացի տրամադրել են նաեւ Մարդու իրավունքների եվրոպական հռչակագիրը՝ ադրբեջաներեն։ Այս կապակցությամբ Ռուբեն Մելիքյանը հիշեցրել է, որ ԼՂՀ-ն 2015-ին միակողմանի կարգով միացել է Եվրոպական հռչակագրին, այդպիսով այդ հիմնարար փաստաթղթի դրույթները տարածվում են Հուսեյնզադեի վրա։
ԼՂՀ մարդու իրավունքների պաշտպանը նաեւ հիշեցրել է, որ վաղը ժամը 15-ին կավարտվի Էլնուր Հուսեյնզադեին ձերբակալության ժամկետը։ «Մենք ակնկալում ենք, որ հետագա իրավական գործընթացները կընթանան ԼՂՀ օրենսդրությամբ, նաեւ Եվրոպական հռչակագրով սահմանված կարգով ու ժամկետներով»,- նշեց Ռուբեն Մելիքյանը։
Հիշեցնենք, որ ըստ ԼՂՀ ԱԱԾ տարածած հաղորդագրության` 2017թ. փետրվարի 1-ին ԼՂՀ Մարտակերտի շրջանի Թալիշ համայնքի ուղղությամբ Ադրբեջանի Հանրապետության Զինված ուժերի մի խումբ զինծառայողներ, օգտվելով մառախլապատ եղանակից, ձեռնարկել են դիվերսիայի փորձ: Փորձը խափանվել է Պաշտպանության բանակի` Արցախի պետական սահմանի պահպանությունն իրականացնող ստորաբաժանման կողմից:
Նույն օրը ժամը 15:00-ի սահմաններում Պաշտպանության բանակի մարտական դիրքերից մեկի պահպանության տեղամասում հայտնաբերվել եւ ԼՂՀ ԱԱԾ բերման է ենթարկվել ԼՂՀ պահպանվող պետական սահմանն ապօրինի հատած դիվերսիոն խմբի անդամ, Ադրբեջանի Հանրապետության քաղաքացի, Ադրբեջանի Հանրապետության Զինված ուժերի 157 մոտոհրաձգային բրիգադի հետախուզական վաշտի զինծառայող Էլնուր Էլման օղլը Հուսեյնզադեն:
Է. Հուսեյնզադեի կողմից դիվերսիայի փորձ կատարելու եւ ԼՂՀ պետական սահմանն ապօրինի հատելու փաստի առթիվ հարուցվել է քրեական գործ ԼՂՀ Քրեական օրենսգրքի 33-317-րդ հոդվածով եւ 350-րդ հոդվածի 1-ին մասով:
Է. Հուսեյնզադեն ձերբակալված է: