Սահմանին զինվոր է զոհվել: Այսօր առավոտյան ղարաբաղա-ադրբեջանական զորքերի շփման գծում հակառակորդի կողմից հրադադարի ռեժիմի խախտման արդյունքում զոհվել է 1997 թվականին ծնված Գոռ Համազասպի Գարեգինյանը:
Գարեգինյանն Ախուրյանի շրջանի Շիրակ համայնքից էր, ընտանիքի ավագ որդին: Երիտասարդը բանակ էր զորակոչվել անցած տարվա աշնանը: Նրա ընտանիքը մի քանի տարի է՝ Ռուսաստանում է բնակվում:
Ադրբեջանցի զինծառայողի դին հանձնել են Ադրբեջանի զինված ուժերի ներկայացուցիչներին: Չինգիզ Սալմանի Գուրբանովը սպանվել էր անցյալ տարվա դեկտեմբերի 29-ին Ադրբեջանի զինուժի իրականացած դիվերսիոն հետախուզական ներթափանցման փորձի ժամանակ: Ադրբեջանցի դիվերսանտի մարմինն ադրբեջանական կողմին են հանձնել փետրվարի 5-ին, հայ-ադրբեջանական սահմանագոտու Իջեւան-Ղազախ հատվածում:
Կենտրոնական ընտրական հանձնաժողովն այսօրվանից սկսել է ընդունել խորհրդարանական ընտրություններին մասնակցության համար կուսակցությունների եւ դաշինքների փաստաթղթերը: Գրանցման վերջնաժամկետը փետրվարի 16-ի ժամը 18-ն է: Առաջին օրվա ավարտին, սակայն, որեւէ կուսակցություն կամ դաշինք փաստաթղթեր չի ներկայացրել:
Մինչ այդ, այսօր կրկին բարձրացվել է ընտրություններն ապրիլի 2-ին անցկացնելու հարցը: ՀԱԿ-ը պատրաստվում է Սահմանադրական դատարանում բողոքարկել ընտրությունների անցկացման ամսաթիվը: Նախաձեռնության եւ հիմնավորումների մասին Ազգային ժողովում խոսել է Լեւոն Զուրաբյանը:
Լեւոն Զուրաբյանն ու Արամ Մանուկյանը ստորագրահավաք են սկսել: Հայցը Սահմանադրական դատարան ներկայացնելու համար 27 պատգամավորի ստորագրություն է անհրաժեշտ: ՀՀԿ խորհրդի վերջին նիստի ժամանակ Սերժ Սարգսյանը հայտարարել էր, որ դեմ չէ ընտրությունների օրը փոխելուն, բայց իշխանություններն առայժմ չեն շտապում այդ հարցով որոշում կայացնել:
ՀԱԿ-ում եւս մեկ հարց են հստակեցրել. ինչպես եւ սպասվում էր՝ ՀԱԿ-ի համապետական ընտրացուցակը գլխավորելու է Լեւոն Տեր-Պետրոսյանը:
Իսկ ո՞վ է գլխավորելու իշխող ՀՀԿ-ի ընտրացուցակը: Վահրամ Բաղդասարյանը լրագրողների հետ զրույցում այդ մասին ոչինչ չի նշել: Առայժմ չի որոշվել նաեւ, թե ով է գլխավորելու կուսակցության նախընտրական շտաբը: Ամեն դեպքում, հայտնի է, որ ընտրացուցակում ամենաշատը 300 թեկնածու կլինի: Փորձում են որակյալ ցուցակ կազմել, քննարկել ու հաշվի առնել յուրաքանչյուր կարողություններն ու հնարավորությունները, որպեսզի ընտրական գործընթացից հասարակության որեւէ շերտ դուրս չմնա:
Լրագրողների հարցին՝ Հովիկ Աբրահամյանից բացի, կուսակցությունից այլ նեղացածներ կա՞ն, Բաղդասարյանը հարցով է պատասխանել. իսկ Աբրահամյանը նեղացա՞ծ է:
Իսկ Հանրապետականի ցուցակում տեղ կունենա՞ն, օրինակ, Մհեր Սեդրակյանը, Սուրիկ Խաչատրյանը: Բաղդասարյանն առայժմ անուններ չի ուզում նշել:
Փոխարենը տարածքային ցուցակով թեկնածությունն առաջադրելու մասին հայտարարել է Սամվել Ալեքսանյանը: Ասում է՝ ժողովուրդը գալիս է, խնդրում, որ նորից առաջադրվի:
Իսկ Սեյրան Սարոյանը կուսակցության որոշմանն է սպասում: Առաջադրվելու ցանկություն ունի, անելու գործ էլ՝ լիքը, բայց «իրա գլխու» ոչինչ չի անի:
Մանվել Գրիգորյանը նույնպես խուսափում է հստակ պատասխանել, առաջադրելու է թեկնածությունը, թե՞ ոչ: Հենց որոշում կայացնի, պրծնի, անպայման կասի: Փետրվարի 18-ին կայանալիք ԵԿՄ համագումարում Սեյրան Օհանյանի հարցը չի քննարկվի, քաղաքականությամբ զբաղվելու նրա որոշումը Միության համագումարի հետ կապ չունի:
Արտակարգ իրավիճակների նախարարությունը նոր ղեկավար ունի: Նախարար է նշանակվել Դավիթ Տոնոյանը՝ ազատվելով պաշտպանության փոխնախարարի պաշտոնից: Վարչապետ Կարեն Կարապետյանն այսօր Տոնոյանին ներկայացրել է նախարարության աշխատակազմին:
Նոր պաշտոնում առաջին քայլերի եւ նախարարությունում հնարավոր փոփոխությունների մասին Դավիթ Տոնոյանն առայժմ չի ուզում խոսել. աշխատելու ժամանակ է խնդրում: Արտակարգ իրավիճակների նախարարի պաշտոնը թափուր էր անցյալ տարվա դեկտեմբերից՝ Արմեն Երիցյանի վախճանից հետո:
ԱՄՆ նախագահ Դոնալդ Թրամփի՝ FoxNews-ին տված հարցազրույցը հերթական սկանդալն է առաջացրել: Այս անգամ նա անդրադարձել է Իրանին՝ այն թիվ մեկ ահաբեկչական երկիրը կոչելով: Թրամփը նաեւ խոստացել է Թեհրանի նկատմամբ պատժամիջոցների դիրքերից գործել: Իսկ դրա մեկնարկն արդեն տրված է: Հունվարի 29-ին Իրանի կողմից միջին հեռահարության բալիստիկ հրթիռների փորձարկմանը հետեւել է Վաշինգտոնի պատժամիջոցների ցանկի ընդլայնումը, որում 13 ֆիզիկական անձ է ներառվել՝ Իրանի, ԱՄԷ-ի, Չինաստանի, Քուվեյթի եւ Լիբանանի քաղաքացիներ:
Ռուսաստանի արձագանքը չի ուշացել: Այդ երկրի արտգործնախարարը հայտարարել է, որ Իրանի եւ ահաբեկչական խմբավորումների միջեւ որեւէ կապ չեն նկատել: Ավելին, Լավրովի հավաստմամբ, Իրանը մեծ ավանդ է ներդնում ահաբեկչության դեմ պայքարում:
Հատկապես Սիրիայի հարցով Մոսկվայի եւ Թեհրանի հարաբերությունների սերտացումը Միացյալ Նահանգներին, կարծես, այնքան էլ դուր չի գալիս: Ամերիկյան Wall Street Journal պարբերականը գրել է, որ Թրամփի վարչակազմն ուսումնասիրում է Ռուսաստանի եւ Իրանի ռազմական ու դիվանագիտական դաշինքը պառակտելու հնարավորությունները:
Պատահարների շարք հանրապետություում: Արարատի մարզում չորս մեքենայի մասնակցությամբ շղթայական ավտովթար է տեղի ունեցել: Մեքենաներից «Toyota»-ն, ինչպես պարզվել է, Արարատի նորանշանակ մարզպետ Արամայիս Գրիգորյանինն է: Մարզպետն աշխատանքի էր գնում: Վթարի հետեւանքով զոհեր եւ վիրավորներ չկան:
Մեկ այլ խոշոր պատահար՝ նույնպես Արարատի մարզում: Երեւան-Երասխավան ճանապարհին մարդատար ավտոբուսը բախվել է բետոնե արգելապատնեշներին եւ կողաշրջվել: 7 մարդ մարմնական վնասվածքներով հիվանդանոց է տեղափոխվել:
Իսկ Կոտայքի մարզում խոշոր վթարին ծեծկռտուք է հաջորդել: Երեւան-Սեւան ավտոճանապարհին BMW մակնիշի մեքենան բախվել է վրացական համարանիշով Scania մակնիշի խոշոր բեռնատարին, այնուհետեւ Volvo մակնիշի մեկ ակլ բեռնատարի՝ նույնպես վրացական համարանիշով: 3 մարդ մարմնական վնասվածքներով հիվանդանոց է տեղափոխվել: Պատահարից հետո BMW-ի ուղեւորները ծեծել են բեռնատարներից մեկի վարորդին:
Եվս մեկ միջադեպ էլ գրանցվել է Ավանի հոգեբուժարանում: Ահազանգ են ստացել, որ հոգեբուժարանում ռումբ է տեղադրված: Հաստատության 81 հիվանդներին տարհանել են, սակայն տեղազննման արդյունքում վտանգավոր ոչինչ չեն գտել:
Հենրիխ Մխիթարյանը շարունակում է ուրախացնել իր երկրպագուներին: Հայաստանի ազգային հավաքականի կիսապաշտպանն այս անգամ աչքի է ընկել «Լեսթեր Սիթի»-«Մանչեսթեր Յունայթեդ» հանդիպման ժամանակ, որն ավարտվել է վերջինի հաղթանակով՝ 0:3 հաշվով:
Ժոզե Մոուրինյոն հպարտանում է իր ֆուտբոլիստով. «Մխիթարյանն այժմ հրաշքներ է գործում խաղադաշտում»: Անգլիական ակումբի Twitter-ի պաշտոնական էջում անցկացված քվեարկության արդյունքում Մխիթարյանը նաեւ ձայների 83%-ով Անգլիայի առաջնության 24-րդ տուրի հանդիպման լավագույն խաղացող է ճանաչվել:
Հայաստանի առաջատար ծանրորդներից Աղասի Աղասյանը հայտարարել է կարիերան ավարտելու մասին: Նրա որոշման մեջ վճռորոշ դեր է խաղացել 400 գրամ ավելացած քաշը: Բանն այն է, որ Ծանրամարտի տղամարդկանց Հայաստանի առաջնությունում Աղասյանը չի կարողացել հանդես գալ 85 կգ քաշային կարգում, քանի որ քաշը 400 գրամ ավելի է եղել: Իսկ 94 կգ քաշային կարգում 344 կգ արդյունքով գրավել է երկրորդ տեղը: Վերջին մոտեցումից հետո ծանրորդը հանել է մարզակոշիկներն ու թողել մրցահարթակի վրա, իսկ պարգեւատրության արարողությանը չի ներկայացել: Ավելի ուշ մարզիկը Facebook-ում գրառում է արել. «Ես հեռանում եմ սպորտից բարձր ճակատով: Թքած ունեմ այն մարդկանց վրա, ովքեր իմ կոշիկներից էժան են»:
Գրառումն ուղղված էր հավաքականի գլխավոր մարզիչ Փաշիկ Ալավերդյանին, ինչից վիրավորված մարզիչն էլ Աղասյանին տրեխի հետ է համեմատել: Հետո հիշեցրել է ծանրամարտում իր վաստակի ու համբավի մասին՝ հավելելով, որ Աղասյանն իրենից նեղացել է, քանի որ ինքը մյուս մարզիչների նման խաբեության չի գնացել:
Եղանակային պայմանների հետեւանքով առաջացող խնդիրներն անվերջանալի են թվում: Օդի ջերմաստիճանի բարձրացումն իր հերթին է խնդիրներ ստեղծել, որոշ դեպքերում՝ կյանքին վտանգ սպառնացող: Սասունցի Դավիթ փողոցի տներից մեկը ժապավենով շրջագծել են, որպեսզի տանիքից թափվող սառույցը չվնասի անցորդներին: Հարեւաններն ասում են՝ եղել են դեպքեր, երբ մարդիկ հրաշքով են փրկվել վերեւից ընկնող սառույցից:
Իսկ Տաշիրում պատուհաս են դարձել առատ ձյունն ու մառախուղը: Հարսանիքի շտապող ավտոշարասյունն արգելափակվել է ձայն մեջ եւ պսակադրության շտապող շուրջ 40 ավտոմեքենաներ երեք ժամ ճանապարհին են մնացել: Փրկարարները մեքենաները ձյան հաստ շերտից դուրս բերելու համար հատուկ տեխնիկա են օգտագործել:
Դոլարի փոխարժեքը փետրվարի 6-ին գրեթե չի փոխվել, փոխարենը թանկացել են եվրոն եւ ռուբլին: Արդյունքում դոլարի փոխարժեքն այսօր կազմել է 485 դրամ, եվրոյինը՝ 522, ռուբլունը՝ 8 դրամ 26 լումա, ֆունտինը՝ 606 դրամ:
Փետրվարի 7-ին հանրապետությունում սպասվում է առանց տեղումների եղանակ: Օդի ջերմաստիճանն աստիճանաբար կբարձրանա 2-3 աստիճանով: Երեւանում նույնպես վաղը տեղումներ չեն սպասվում: Մայրաքաղաքում գիշերը բարձրադիր վայրերում կդիտվի -9-11, ցածրադիր վայրերում՝ -16-18, իսկ ցերեկը՝ -2-4 աստիճան ցուրտ: