ՀՀ բնապահպանության նախարար Արծվիկ Մինասյանն այսօր՝ փետրվարի 7-ին, հրաման է ստորագրել 2017թ. ընթացքում ՀՀ ջրային տարածքներում արդյունագործական որսի չափաքանակները սահմանելու մասին.
Հրամանում, մասնավորապես, նշվում է.
«Համաձայն «Որսի եւ որսորդական տնտեսության վարման մասին» Հայաստանի Հանրապետության օրենքի 5-րդ հոդվածի 2-րդ մասի եւ 8-րդ հոդվածի 8-րդ կետի եւ հիմք ընդունելով Հայաստանի Հանրապետության կառավարության 2002 թվականի օգոստոսի 8-ի N1237-Ն որոշման 2-րդ կետի «ա» ենթակետով հաստատված N1 հավելվածի 12-րդ կետի «դ» ենթակետը
Հրամայում եմ՝
1. Հայաստանի Հանրապետության ջրային տարածքներում 2017 թվականի ընթացքում սահմանել կարաս, ծածան եւ խեցգետին կենդանատեսակների արդյունագործական որսի հետեւյալ չափաքանակները.
1) Կարաս` մինչեւ 100 տոննա,
2) Ծածան` մինչեւ 100 տոննա,
3) Խեցգետին` մինչեւ 3000 տոննա, որից Սեւանա լճում՝ 1100 տոննա:
2.Հայաստանի Հանրապետության բնապահպանության նախարարության աշխատակազմի կենսառեսուրսների կառավարման գործակալության պետին` կենդանական պաշարների օգտագործման մասին պայմանագրերի կնքման գործընթացը կազմակերպելիս հիմք ընդունել սույն հրամանի 1-ին կետում նշված չափաքանակները:
3. Հայաստանի Հանրապետության բնապահպանության նախարարության աշխատակազմի բնապահպանական պետական տեսչության պետին`
1) սահմանված կարգով վերահսկողություն իրականացնել Հայաստանի Հանրապետության ջրային տարածքներում արդյունագործական ձկնորսության նկատմամբ,
2) ուժեղացնել վերահսկողությունն իշխան, կողակ եւ սիգ ձկնատեսակների ապoրինի որսի եւ վաճառքի կանխարգելման ուղղությամբ` համագործակցելով Հայաստանի Հանրապետության իրավապահ մարմինների հետ»: