Ազգային ժողովի պատգամավորներ, նախկին վարչապետներ Հրանտ Բագրատյանն ու Խոսրով Հարությունյանն այսօր` փետրվարի 8-ին, «Բնակարանային հիփոթեքային կրեդիտավորման մասին եւ կից ներկայացված ներկայացված օրինագծերի փաթեթն» առաջին ընթերցմամբ ընդունելու քվեարկության ժամանակ վիճեցին:
Մասնավորապես Հրանտ Բագրատյանը հորդորեց դեմ քվեարկել այս նախագծին, քանի որ սրանով սահմանվում է` եթե հիփոթեքը շուտ ես վճարում, պարտավոր ես մնացած տոկոսներն էլ վճարել:
«Վարչապետներից մեկը երեկ լրիվ թյուրիմացության մեջ գցեց, դրա համար դահլիճի լույսերն անջատվեցին, նույնիսկ հոսանքը չդիմացավ: Այս նախագիծն այն մասին է, որ մեկին գցել են քացու տակ, ասում ենք` ինչի եք սենց բան անում, դուք էլ ասում եք` զատո գլխին չենք խփում»,- ասաց Հրանտ Բագրատյանը` նկատի ունենալով Խոսրով Հարությունյանին:
ՀՀԿ-ական պատգամավորը կրկին պնդեց` այս նախագծով սահմանվում են կողմերի միջեւ փոխհարաբերությունների կարգավորման համար բոլոր հնարավոր նորմերը:
«Հնարավորություն է տրվում վարկառուին վաղաժամկետ մարել իր պարտավորությունները, առանց տույժ ու տուգանք վճարելու, վճարելով միայն այդ պահին սահմանված տոկոսադրույքները»,- ասաց Խոսրով Հարությունյանը:
Հրանտ Բագրատյանը տեղից գոռաց` սուտ է, ինչին Խոսրով Հարությունյանն արձագանքեց. «Մի խեղաթյուրեք, չափի մեջ գտնվեք, սուտասան»:
ԱԺ նախագահ Գալուստ Սահակյանն էլ իր հերթին նկատողություն արեց Հրանտ Բագրատյանին. «Մի քիչ չափավոր, պարոն Բագրատյան, այդպես չի կարելի»:
