Փետրվարի 8-ի նիստում խորհրդարանը վավերացրեց ԱՊՀ-ի ինտեգրված արժութային շուկայի մասին համաձայնագիրը: NEWS.am-ի թղթակիցը ԱԺ-ից հայտնեց, որ կողմ է քվեարկել 82 պատգամավոր, դեմ՝ 7, 3 պատգամավոր ձեռնպահ է մնացել:
ԱՊՀ անդամ երկրների ինտեգրված արժութային շուկայի կազմակերպման ոլորտում համագործակցության մասին համաձայնագիրը ստորագրվել է 2012 թվականի դեկտեմբերին Աշգաբադում: Այն առայժմ վավերացրել են Ռուսաստանը, Բելառուսը, Ղազախստանը եւ Ղրղզստանը:
Ըստ համաձայնագրի՝ ԱՊՀ-ի մի երկրի ռեզիդենտ բանկերը կարող են միջբանկային արժութային գործարքներ կատարել Համագործակցության մյուս երկրների արժութային շուկաներում՝ նույն պայմաններով, ինչ այդ երկրների ռեզիդենտ բանկերը: Բանկերը հնարավորություն են ստանում գործընկեր երկրներում արժույթը փոխանակել՝ առանց միջնորդավճարի եւ այլ ծախսերի:
