Հավաքական անվտանգության պայմանագրի կազմակերպության (ՀԱՊԿ) անդամ պետությունները պետք է համաձայնեցնեն երրորդ երկիր զենքի մատակարարումը։ Այս մասին խորհրդարանում ՀԱՊԿ–ի շրջանակներում զինվորական եւ այլ ստորաբաժանումների, շարժական տեխնիկայի եւ ռազմական նշանակության արտադրանքի տեղափոխման հարցով համաձայնագրի վավերացման շուրջ քննարկումների ժամանակ հայտարարել է Հանրապետական խմբակցության պատգամավոր Խոսրով Հարությունյանը։ Համաձայնագիրը ստորագրվել էր 2015 թվականին Դուշանբեում։
Պատգամավորի խոսքով, եթե ՀԱՊԿ անդամ պետությունները որոշում են համաձայնեցնել զենքի տեղափոխումը, ապա տեղին է հիշել ՀԱՊԿ–ի կանոնադրությունը՝ անդամ պետությունները պետք է խուսափեն երրորդ երկրների հետ հարաբերություններում այնպիսի քայլերից, որոնք կարող են սպառնալ ինչպես կազմակերպության առանձին անդամների, այնպես էլ հավաքական անվտանգությանը։ «Սա վերաբերում է Ադրբեջանին Բելառուսից եւ Ռուսաստանից զենքի մատակարարումներին։ Այս հարցերը կարելի է բարձրացնել, սակայն առաջին հերթին անհրաժեշտ է հիշել մեր անվտանգության մասին։ Պետք չէ ամեն առիթով սպառնալ դուրս գալ ՀԱՊԿ–ից։ Պետք է հիշենք, որ մեզ համար ՀԱՊԿ–ը ոչ պակաս կարեւորություն, քան մյուս անդամ պետությունների համար։ Պետք է խելամիտ գործենք, սեփական անվտանգության շահերից ելնելով», – նշել է Խոսրով Հարությունյանը։