Զոհ եւ վիրավոր սահմանին: Հակառակորդի արձակած կրակոցից զոհվել է 1979 թվականին ծնված պայմանագրային զինծառայող Գեղամ Հենրիկի Մանուկյանը: Մանուկյանը Մարտակերտից էր, ամուսնացած էր, երեխաներ ուներ: Բանակում ծառայում էր շուրջ 20 տարի: Նախկինում էլ վիրավորվել էր, իսկ ապաքինվելուց հետո վերադարձել ծառայության:
Հակամարտ զորքերի շփման գծի Մարտակերտի ուղղությամբ հրադադարի ռեժիմի խախտման հետեւանքով էլ վիրավորվել է Արցախի պաշտպանության բանակի ժամկետային զինծառայող, 1998 թվականին ծնված Կորյուն Կամոյի Կիրակոսյանը: 19-ամյա Կիրակոսյանը վիրավորվել է գլխի շրջանում, նրան Մարտակերտի հոսպիտալում վիրահատել են: Զինծառայողի վիճակը ծանր են գնահատում:
Իսկ երեկ ղարաբաղա-ադրբեջանական զինված ուժերի շփման գծում ձեռնարկած հերթական սադրանքից հետո Ադրբեջանի պաշտպանության նախարարությունը հաղորդագրություն է տարածել հայկական կողմի, իբր, նախահարձակ լինելու մասին: Արցախի պաշտպանության նախարարությունը սա անհեթեթ ապատեղեկատվություն է որակել:
Մինչ այդ, գիշերը սահմանագծում լարվածությունն աճել է: Հայկական կողմը պատասխան գործողությունների է դիմել:
Զինված ու դիմակավորված հատուկ ջոկատայիններ, ձեռնաշղթաներ, ինչպես նաեւ մեծ թվով տեսախցիկներ: Բելառուսի կողմից Ադրբեջանին արտահանձնված բլոգեր Ալեքսանդր Լապշինին Բաքվում միջազգային մասշտաբի հանցագործի նման են ընդունել:
Լապշինի արտահանձնման թեման այսօր ակտիվորեն քննարկվել է Հայաստանի Ազգային ժողովում: Պատգամավորները հայտարարություններ են արել, բլոգերի արտահանձնումը Հայաստանի եւ Ռուսաստանի դեմ ուղղված կեղտոտ խաղ որակել, նաեւ առաջարկել հետ կանչել Մինսկում Հայաստանի դեսպանին եւ ՀԱՊԿ-ին Բելառուսի անդամակցությունը դադարեցնելու հարց բարձրացնել:
«Ելք» դաշինքն էլ Երեւանում Բելառուսի դեսպանատան առջեւ ցույց է կազմակերպել ու դեսպանի հետ հանդիպում պահանջել: Դեսպանը, ինչպես կարելի էր սպասել, չի արձագանքել: Նշենք, որ Ռուսաստանի եւ Իսրայելի քաղաքացի Ալեքսանդր Լապշինը Բաքվի «ցասումին» արժանացել է առանց Ադրբեջանի «թույլտվության» Արցախ այցելելու համար ու ներառվել այդ երկրի հայտնի «սեւ ցուցակում»: Այստեղ բլոգերին մեղադրում են «Պետական սահմանի մասին» օրենքը խախտելու համար:
Լապշինի արտահանձնման թեման շարունակվել է նաեւ Ազգային ժողովում կառավարության հետ հարցուպատասխանի ժամանակ: Արտգործնախարարը բլոգերի արտահանձնման գործարքն ամոթալի է կոչել, բայց համոզմունք է հայտնել, որ Արցախ այցելող օտարերկրացիների թիվն այս իրադարձության հետեւանքով չի նվազի, հակառակը՝ կավելանա: Էդվարդ Նալբանդյանը նաեւ խորհուրդ է տվել չտրվել Բաքվի սադրանքներին:
Լյուդմիլա Սարգսյանն էլ կրկին բարձրացրել է խորհրդարանական ընտրությունների ամսաթվի հարցը՝ շեշտադրելով, որ ապրիլի 2-ն ապրիլյան պատերազմի տարելիցն է: Դավիթ Հարությունյանն արձագանքել է. տոնակատարություն չենք կազմակերպում, ընդամենը քվեարկություն ենք անցկացնելու: Իսկ այլ օր ընտրել, այո, հնարավոր էր, բայց այդ դեպքում նույնպես, Հարությունյանի համոզմամբ, շահարկումներից չէինք խուսափի:
Իսկ վարչապետ Կարեն Կարապետյանին Արամ Մանուկյանը հորդորել է Ազգային ժողով գալիս իր շուրջը պատնեշներ չստեղծել ու չխուսափել լրագրողների հետ զրուցելուց: Կարապետյանը հակադարձել է. կարծիք էլ կա, որ չափազանց շատ է շփվում մամուլի հետ, բայց, խոստովանել է, ոչ միշտ է հաճույք ստանում:
Մինչ կառավարության անդամների ժամանելը խորհրդարանում կրքերը փոքր-ինչ թեժացել էին. «Բնակարանային հիփոթեքային կրեդիտավորման մասին եւ կից ներկայացված օրինագծերի փաթեթն» առաջին ընթերցմամբ քվեարկության դնելիս Հրանտ Բագրատյանն ու Խոսրով Հարությունյանը վիճաբանել են, բանը հասել է նաեւ վիրավորանքների:
Հրանտ Բագրատյանը հորդորել է դեմ քվեարկել օրինագծերի փաթեթին: Ասում է՝ թյուրիմացության մեջ են գցում, հիփոթեքային վարկը մարելիս հարկ կլինի մնացած տոկոսներն էլ վճարել: Խոսրով Հարությունյանը վստահեցրել է, որ նախատեսվում է ոչ թե տույժ ու տուգանք, այլ միայն այդ պահին սահմանված տոկոսադրույքների վճարում: Բագրատյանը տեղից բղավել է՝ սուտ է: Հենց այստեղ էլ Հարությունյանի նյարդերը տեղի են տվել:
Խոշոր վթար մերկասառույցի պատճառով: Կոտայքի մարզում Ջրվեժ-Ձորաղբյուր ճանապարհին իրար են բախվել Mercedes եւ Honda մակնիշների մեքենաները, իսկ վերջինը բախվել է նաեւ ճանապարհի թույլատրելի հատվածում կայանված Nissan-ին: Mercedes-ի 23-ամյա վարորդին հիվանդանոց են տեղափոխել:
Դոլարը թանկանում է, եվրոն՝ հակառակը, էժանանում: Արդյունքում դոլարի փոխարժեքն այսօր կազմել է 486 դրամ, եվրոյինը՝ 517, ռուբլունը՝ 8 դրամ 18 լումա, ֆունտինը՝ 607 դրամ:
Փետրվարի 9-ին հանրապետության առանձին շրջաններում ձյուն է սպասվում: Օդի ջերմաստիճանը 9-ի գիշերը կբարձրանա 4-6 աստիճանով, 9-ի ցերեկը Լոռիում, Տավուշում, Սյունիքում եւ Արցախում կնվազի 7-10 աստիճանով: Երեւանում փետրվարի 9-ին սպասվում է ամպամածություն, հնարավոր է՝ թույլ ձյուն: