Իսկական հերոսները ռազմական գործողությունների ժամանակ զոհված տղաներն են: Հենց նրանք եւ նրանց հարազատներն են ամեն տեսակի պարգեւի ու պատվի արժանի: NEWS.am-ի հետ զրույցում այսպիսի տեսակետ հայտնեց Լեռնային Ղարաբաղի Պաշտպանության բանակի տանկիստ, 20-ամյա Արթուր Գրեյանը:
Արթուրը մասնակցել է ապրիլյան պատերազմի ռազմական գործողություններին եւ այդ ժամանակ շատ ընկերների է կորցրել: Նրա խոսքով՝ այդ ժամանակից ի վեր ինքը մշտապես նրանց մասին է մտածում: Իսկ ապրիլյան պատերազմը կհիշի ամբողջ կյանքի ընթացքում:
«Այդ պատերազմն ուղղակի անհնար է մոռանալ: Ապրիլին ես շատ ընկերների կորցրի, նրանց թվում՝ մեր վաշտի հրամանատար, ավագ լեյտենանտ Բենիամին Եղոյանին, տանկի մեխանիկ եւ վարորդ Տիգրան Աբգարյանին, նաեւ օպերատոր-նշանառու Վլադիմիր Ալիխանյանին: Նրանց բոլորին սրտի մեծ ցավով եմ հիշում: Այդ նրանք են իսկական հերոսները: Ես հպարտ եմ, որ այդպիսի ընկերներ եմ ունեցել, որ այնպիսի հրամանատար եմ ունեցել, ինչպիսին Բենիամին Եղոյանն էր»,- ասաց Արթուրը:
Ապրիլյան պատերազմին մասնակցելու համար ԼՂՀ նախագահ Բակո Սահակյանը Արթուրին պարգեւատրել է «Խիզախության» մեդալով: Այսօր՝ փետրվարի 11-ին, Արթուրին կրկին պարգեւի են ներկայացրել բացառիկ ծառայության համար, այս անգամ՝ Երեւանում:
Արթուրը եւ եւս 19 զինվոր, որոնք աչքի են ընկել զինծառայության ժամանակ, մասնակցել են Սուրբ Սարգսի օրվան նվիրված հանդիսավոր միջոցառմանը: Հայաստանի նախագահ Սերժ Սարգսյանը ելույթով դիմել է զինվորներին եւ նրանց ծնողներին, որից հետո Արարատյան Հայրապետական թեմի առաջնորդական փոխանորդ, արքեպիսկոպոս Նավասարդ Կճոյանը նրանց պարգեւներ է հանձնել, որոնց թվում՝ հատուկ նրանց համար պատվիրված խաչեր: Այս 20 զինվորները նաեւ 10-օրյա արձակուրդ են ստացել, որը կանցկացնեն տանը՝ ընտանիքի եւ սիրած աղջկա հետ:
«Եթե ինձ հարցնեին, ապա ես կուզեի, որ մեր զորամասի բոլոր զինվորներն այսօր պարգեւատրվեին եւ 10 օր տանն անցկացնելու հնարավորություն ստանային»,- մեզ հետ զրույցում խոստովանեց Արթուրը:
