Արցախում փետրվարի 8-ին, վիրավորում ստացած ժամկետային զինծառայող Կորյուն Կիրակոսյանի վիճակը շարունակում է մնալ ծայրահեղ ծանր: Այս մասին այսօր՝ փետրվարի 13-ին, NEWS.am-ի հետ զրույցում ասաց Կենտրոնական կլինիկական զինվորական հոսպիտալի պետ Արամ Ասատուրյանը: Նա նշեց, որ զինծառայողի վիճակում որեւե փոփոխություն դեռ չկա:
«Վիճակում բացասական փոփոխություն չկա, իսկ դա արդեն լավ է: Իր այս վիճակում, եթե վիճակի վատացում լինի՝ կաող է ճակատագրական լինել»,-ասաց նա՝ նշելով, որ վիրավորվելուց 5 օր անց զինծառայողը դեռեւս գիտակցության չի եկել:
Կորյուն Կիրակոսյանը Գեղարքունիքի մարզի Արծվաշեն գյուղից է: Նա ընտանիքի ավագ երեխան է, ունի իրենից փոքր քույր: Նրա ծնողները Ռուսաստանի Դաշնությունում են աշխատում, սակայն, զինածառայողի վիրավորվելուց հետո վերադարձել են Հայաստան:
Նշենք, որ 19-ամյա Կորյունին նախ տեղափոխել էին Մարտակերտի հոսպիտալ, որտեղ վիրահատել էին, որից հետո տեղափոխել էին Ստեփանակերտ, այնուհետեւ Երեւան:
Ավելի վաղ ԼՂՀ պաշտպանության բանակի մամուլի ծառայությունից հայտնել էին, որ փետրվարի 8-ին ժամը 12:00-ի սահմաններում հակամարտ զորքերի շփման գծի Մարտակերտ ուղղությամբ կրկին հակառակորդի կողմից հրադադարի ռեժիմի խախտման արդյունքում, ծանր վիրավորում է ստացել ՊԲ ժամկետային զինծառայող, 19-ամյա Կորյուն Կամոյի Կիրակոսյանը: