Դուբայի ճանապարհների ու տրանսպորտի վարչությունը ծրագրել է այս տարվա հուլիսին գործարկել ինքնակառավարվող թռչող մեքենաներով տաքսի ծառայություն։ Այս մասին հայտնել է վարչության ղեկավար Մատտար ալ Թայերը, փոխանցում է Associated Press–ը։
Ehang 184 մոդելի ինքնակառավարվող մեքենան, որը վարչությունը մշակել է չինական ֆիրմայի հետ, ներկայացվել է Դուբայում համաշխարհային կառավարական գագաթնաժողովին, որը անցել է փետրվարի 12-14-ը։ Ալ Թայերի խոսքով, դրոնը կարող է մինչեւ 110 կգ քաշով բեռներ փոխադրել ու հաջողությամբ անցել է փորձարկումներ։
Նոր թռչող սարքը արտաքուստ հիշեցնում է 3․9 մետր երկարության, չորս մետր լայնության ու 1․6 մետր բարձրության ուղղաթիռ։ Փոխադրամիջոցի քաշը 250 կգ է։ Ehang 184 -ն ունի թաչսքրին, որի վրա ուղեւորը կարող է ընտրել նշանակության վայրը։ Թռիչքի ու վայրէջքների հնարավոր կետերի քանակը սահմանափակ է, թռիչքները ցամաքից վերահսկելու են մասնագետները անլար կապի համակարգի միջոցով։
Դրոնը կարող է օդում գտնվել 30 րոպե ու զարգացնել ժամում 160 կմ արագություն, բայց քաղաքի սահմաններում արագությունը կսահմանափակվի 100 կմ/ժ-ով։ Ինքնակառավարվող տաքսին նախագծված է ցանկացած եղանակային պայմանների համար, բացի ամպրոպից։ Այն կարող է թռչել մոտ 900 մետր բարձրության վրա։