ԱՊՀ-ի հատուկ ծառայությունները այս տարի ուսումնական վարժանքներ կանցկացնեն համացանցում ահաբեկիչներին հավաքագրողներին եւ միջազգային ահաբեկչական կազմակերպությունների գործակալներին հայտնաբերելու համար: ՏԱՍՍ-ի փոխանցմամբ՝ այս մասին ԱՊՀ-ի անդամ երկրների ազգային հակաահաբեկչական կենտրոնների ղեկավարների 10-րդ խորհրդակցությանը հայտնել է ԱՊՀ-ի Հակաահաբեկչական կենտրոնի (ՀԱԿ) ղեկավար, գեներալ-գնդապետ Անդրեյ Նովիկովը:
Համատեղ հակաահաբեկչական ուսումնական վարժանքները՝ «Դուշանբե-Հակաահաբեկչություն», կանցկացվեն մայիսի վերջին եւ հունիսի սկզբին 6 երկրների՝ Հայաստանի, Բելառուսի, Ղազախստանի, Ղրղզստանի, Ռուսաստանի եւ Տաջիկստանի տարածքներում, ներգրավելով հատուկ ծառայություններին, զինվորականներին եւ այդ երկրների մի շարք այլ իրավասու մարմինների: Վարժանքների եզրափակիչ փուլը կանցկացվի Տաջիկստանում:
Նովիկովն ընդգծել է, որ գրոհայինների հավաքագրմանը հակազդելու աշխատանքների ընթացքում ՀԱԿ-ի տվյալների բանկում հավաքվել են համացանցի նյութերի եւ հաշիվների մասին տվյալներ, որոնք ԱՊՀ-ի երկրներում ահաբեկչական եւ ծայրահեղական են ճանաչվել: «Ներկայումս մենք տեղեկություններ ենք հավաքել 1,618 հազար տեղեկատվական հաշիվների մասին, որոնք գրոհում են մեր երկրների քաղաքացիների գիտակցության եւ ենթագիտակցության վրա»,- ընդգծել է ԱՊՀ-ի ՀԱԿ-ի ղեկավարը:
ԱՊՀ անդամ երկրների ազգային հակաահաբեկչական կենտրոնների ղեկավարների խորհրդակցությանը մասնակցում են ԱՊՀ 10 երկրների՝ Ադրբեջանի, Հայաստանի, Բելառուսի, Ղազախստանի, Ղրղզստանի, Մոլդովայի, Ռուսաստանի, Տաջիկստանի, Թուրքմենստանի եւ Ուզբեկստանի հատուկ ծառայությունները: Օրակարգում են հետեւյալ հարցերը՝ սիրիա-իրաքյան գոտում իրավիճակի սրման պայմաններում ահաբեկչական սպառնալիքի գնահատումը, իրավիճակի զարգացման կանխատեսումը եւ ԱՊՀ-ի արտաքին սահմաններում ահաբեկչական դրսեւորումների հնարավոր ձեւերը, ահաբեկչական կազմակերպությունների հավաքագրման գործունեությանը հակազդեցությունը:
