Փետրվարի 18-ին Երեւանում բրիտանական ֆիլմերի հերթական փառատոնը կբացվի: Այն նախաձեռնել է Բրիտանական խորհուրդը՝ Հայաստանում Մեծ Բրիտանիայի դեսպանության եւ «Beeline» ընկերության աջակցությամբ: Ցուցադրությունները տեղի կունենան փետրվարի 18-24-ին:
«Հայ հանդիսատեսին կրկին կներկայացվեց բրիտանական կինոյի լավագույն նմուշները»,- փետրվարի 15-ին լրագրողների հետ հանդիպմանը նշել է Հայաստանում Մեծ Բրիտանիայի արտակարգ եւ լիազոր դեսպան Ջուդիթ Ֆարնուորթը:
Փառատոնը կբացվի սոցիալական թեմատիկայի դասական Քեն Լոուչի «Ես, Դենիել Բլեյքը» ֆիլմով: Այն արժանացել է Կաննի կինոփառատոնի եւ BAFTA-ի մրցանակների: «Սա պատահական չէ, քանի որ այս տարի փառատոնի գլխավոր թեմաներից մեկը մարդու իրավունքների պաշտպանությունն է լինելու: Մենք այս թեման ընտրել ենք, քանի որ այն Բրիտանիայի կառավարության առաջնահերթություններից է»,- ասել է դիվանագետը:
Փառատոնի շրջանակում սեմինարներ կկազմակերպվեն աշակերտների եւ ուսանողների համար, ինչպես նաեւ «Ներառականությունն իմ շրջապատում» թեմայով բաց ֆոտոմրցույթ: Հաղթողին ընտրելու են բաց քվեարկությամբ:
Ավանդույթի համաձայն՝ փառատոնի անցկացմանն աջակցում է «Beeline» ընկերությունը: «Վստահ եմ, որ բրիտանական ֆիլմերի փառատոնը կարեւոր իրադարձություն է Հայաստանի մշակութային կյանքում: Այն արդեն ճանաչում ունի, դրան սպասում են: Եվ մենք ուրախ ենք օգնել այն ավելի հետաքրքիր եւ հարուստ դարձնելուն»,- նշել է Հայաստանում «Beeline»-ի գլխավոր տնօրեն Անդրեյ Պյատախինը:
Ֆիլմերը կցուցադրվեն նաեւ Գյումրիում, Արմավիրում, Գավառում եւ Դիլիջանում: Ցուցադրություններին կհետեւեն քննարկումներ: Մուտքն ազատ է: Երեւանում եւ մարզերում յուրաքանչյուր ֆիլմ կցուցադրվի չորս անգամ, այդ թվում երկու անգամ՝ հայերեն լուսագրերով: