Թուրքիայում ժողովրդավարական քննարկումների տարածքը կտրուկ կրճատվել է հասարակության մի շարք շերտերի, այդ թվում լրագրողների, պատգամավորների, գիտնականների եւ շարքային քաղաքացիների դատական հետապնդումների ընդլայնման հետեւանքով: Կառավարական միջոցառումները պլյուրալիզմը սահմանափակում են եւ ինքնագրաքննության հանգեցնում: Այս մասին հայտարարել է Եվրոպայի խորհրդի մարդու իրավունքների հանձնակատար Նիլս Մույժնիեկսը, որը հուշագիր է հրապարակել՝ նվիրված Թուրքիայում արտահայտվելու եւ լրատվամիջոցների ազատությանը, որը հիմնված է Թուրքիա 2016 թվականի ապրիլին եւ սեպտեմբերին կատարած այցերի արդյունքների վրա:
Հանձնակատարն ափսոսանք է հայտնել, որ լրատվամիջոցների եւ արտահայտվելու ազատության ոլորտում զգալի առաջընթացը, որ ԵԽ հետ համագործակցությամբ Թուրքիայում իրականացվել էր մեծ ջանքերի գնով, ընդհատվել է եւ վերջին տարիներին կասկածի տակ դրվել, որն արդեն տագնապալի վիճակի էր հանգել 2016-ի ապրիլին այդ երկիր այցելելու ժամանակ:
Զեկույցում նշված է, որ իրավիճակը զգալիորեն վատացել է արտակարգ դրություն մտցնելուց հետո, որը Թուրքիայի գործադիր իշխանությանը փաստացի անսահմանափակ լիազորություններ է տալիս եւ թույլատրում է արմատական միջացառումներ կիրառել, այդ թվում՝ լրատվամիջոցների եւ հասարակական կազմակերպությունների նկատմամբ՝ միայն ահաբեկչական կազմակերպության հետ կապեր ունենալու պնդումների հիման վրա, դրա հետ մեկտեղ չպարտավորվելով ապացույցներ ներկայացնել կամ դատական որոշման ընդունմանը սպասել:
