Վերջին 2-3 տարիներին Անդրկովկասի իրավիճակը մնացել է Ուկրաինայի եւ Սիրիայի իրադարձությունների ստվերում: Այդուհանդերձ, տարածաշրջանը շարունակում է խնդրահարույց մնալ, իսկ հակամարտությունները պահպանվում են:
Այս մասին փետրվարի 16-ին՝ մամուլի ասուլիսի ժամանակ ասաց քաղաքագետ Սերգեյ Մարկեդոնովը
Ըստ նրա՝ չեն կարող ինչ-որ արդյունքների ձեռքբերման մասին խոսել, հատկապես ղարաբաղյան հակամարտության կարգավորման ուղղությամբ: Առկա է հակասությունների չափազանց բարդ թնջուկ, ըստ որում՝ թեժացումը որոշակի պատճառներ ունի: Քաղաքագետի գնահատմամբ՝ Ղարաբաղի հարցում Ռուսաստանի դիրքորոշումն ավելի բարդ է, քան տարածաշրջանի այլ հակամարտություններում՝ Աբխազիայի եւ Հարավային Օսիայի: «Ռուսաստանը տարբեր խաղացողների հետ համագործակցելու կամ չհամագործակցելու տարբեր աստիճանի պատրաստվածություն ունի: Ռուսաստանի եւ Արեւմուտքի միջեւ գոյություն չունի կոշտ դիմակայություն, ավելին՝ Արեւմուտքը դեմ չէ, որ Ռուսաստանն ավելի ակտիվանա: Ո՛չ Ֆրանսիան, ո՛չ ԱՄՆ-ը ներգրավվելու ժամանակ չունեն, ուրեմն ինչու Ռուսաստանին որոշակի հնարավորություններ չտան, բայց դրան զուգահեռ ասելով, որ արդյունք չկա: Ռուսաստանի համար Ղարաբաղի հիմնախնդիրը կարեւոր է, բայց դա առաջին պլանի խնդիր չէ: Ռուսաստանն ամեն ինչ չի թողնի եւ խնդիրը լուծի այն դեպքում, երբ իրենք կողմերը դա չեն ցանկանում, իսկ հասարակությունն ավելի արմատական է տրամադրված, քան իշխանությունները»,- նշեց Սերգեյ Մարկեդոնովը:
Նրա խոսքով՝ ե՛ւ Բաքուն, ե՛ւ Երեւանը կցանկանային, որ Մոսկվան վերջնական ընտրություն կատարեր: Բայց դա չի լինի: Չարժե Ադրբեջանին բացահայտ թշնամու վերածել, ըստ որում՝ դա ձեռնտու չէ առաջին հերթին Հայաստանին, հիշեցրեց քաղաքագետը: Այս համատեքստում նա նշեց Թուրքիայի գործոնի մասին: Դա կհանգեցներ վտանգների բազմապատկմանը: Ռուսաստանը կարող է ընտրություն կատարել եւ կկատարի: Սակայն հարկ է հիշել, որ դա վտանգների հետ է կապված, իսկ ջանքերը կկենտրոնանան խնդիրը խաղաղ ճանապարհով լուծելու փորձերի վրա, նշեց Մարկեդոնովը: Հիշեցնելով ՌԴ ԱԳ նախարար Սերգեյ Լավրովի հայտարարությունը, թե հակամարտությունը Ադրբեջանի ներքին գործը չէ՝ քաղաքագետը նշեց, որ ցանկացած հակամարտություն երկրի ներքին գործը չէ, եւ նույնիսկ Ռուսաստանը Չեչնիայի հետ հայտնվել էր միջազգային հանրության ուշադրության կենտրոնում: «Ցանկացած որոշում պետք է հաշվի առնի Ռուսաստանի շահերը»,- ընդգծեց քաղաքագետը:
