Բլոգեր Ալեքսանդր Լապշինի պատմությունը մի քանի չափումներից է կազմված: Այս մասին փետրվարի 16-ին Երեւանում կայացած մամուլի ասուլիսի ժամանակ ասաց քաղաքագետ Սերգեյ Մարկեդոնովը:
Նա նախ նշեց ռուս-բելառուսական հարաբերությունների մասին. «Երբ ինչ-որ բան սակարկելու համար է օգտագործվում, քո դիրքերին հասնելու համար: Երբ մարդու կյանքը երկրորդ պլան է մղվում»: Նա այնուհետեւ նշեց հետխորհրդային տարածքում ինտեգրացիայի խնդիրների մասին՝ ասելով, որ շատերի շահերը չեն համընկնում
Նրա խոսքով՝ այդպիսի «առկախված» կարգավիճակով դե ֆակտո կազմավորումներ այցելություններն անհրաժեշտ են: «Այնտեղ մարդիկ են ապրում: Սովորում են, ամուսնանում, բաժանվում: Նրանք պատրաստ չեն Ադրբեջանն իրենց հայրենիքը համարելուն: Իսկ մարդիկ դրսից ինչպե՞ս իմանան, թե այնտեղ ինչ է կատարվում: Հետեւաբար՝ լրագրողները եւ քաղաքագետները պետք է այցելեն: Իսկ աստղագետն ինչպե՞ս կկարողանա աստղագիտությամբ զբաղվել՝ աստղերին չհետեւելով»,- նշեց քաղաքագետը՝ հիշեցնելով, որ Ադրբեջանում էլ է եղել, եւ իր կարծիքը չի փոխվում որեւէ վայրում գտնվելու հետեւանքով: Ըստ որում՝ նա ասաց, որ պատրաստ է Բաքու մեկնել եւ ցանկացած հարցի պատասխանել:
«Հարցը պետք է բանակցություններով լուծվի, փոխզիջումներով, հնարավոր չէ 1988-ին վերադարձը, թեկուզ այն պատճառով, որ դա Խորհրդային Ադրբեջանն էր՝ խորհրդային մեխանիզմներով: Հազիվ թե ներկայիս Հայաստանն ու Ադրբեջանը դրան պատրաստ լինեն»,- նշեց Մարկեդոնովը՝ հիշեցնելով, որ Ադրբեջանի ԱԳՆ-ի «սեւ ցուցակը» արդեն 4 տարեկան է, իսկ հակամարտությունը, միեւնույն է, չի լուծվում:
