Ռուսաստանի նախագահի աշխատակազմը պետական լրատվամիջոցներից պահանջել է քիչ «ականջահաճո» նյութեր հրապարակել ԱՄՆ նոր նախագահ Դոնալդ Թրամփի մասին։ Այս մասին հայտնում է Bloomberg–ը՝ վկայակոչելով երեք անանուն աղբյուրներ։
Գործակալությունը հայտնում է, որ Ռուսաստանի ղեկավարության շրջանում աճում են մտահոգությունները, որ Ռուսաստանի հանդեպ Թրամփի քաղաքականություն այնքան էլ բարեկամական չի լինի, որքան ակնկալվում էր։
Bloomberg-ի աղբյուրներից մեկն ասել է, որ Կրեմլը իր այդ կարգադրությունը բացատրել է ԱՄՆ-ում տեղի ունեցած իշխանափոխության հանդեպ լսարանի նվազող հետաքրքրությամբ։
Լրագրող Կոնստանտին Էգգերտը մինչ այդ հայտնել էր , որ լրատվամիջոցները կարգադրություն են ստացել նվազագույնի հասցնել ամերիկյան իրադարձությունների լուսաբանումը։ Էգգերտը վկայակոչում էր պետական մեդիահոլդինգում աշխատող իր ծանոթներից մեկին։