Գազի մասին անհիմն ու խոհանոցային խոսակցություններին պետք է վերջ տալ: Այս մասին այսօր՝ փետրվարի 17-ին, NEWS.am-ի հետ զրույցում նշեց «Սպառողների խորհրդատվության կենտրոն» ՀԿ նախագահ Կարեն Չիլինգարյանը:
Նրա խոսքով՝ մարդիկ մտածում են, որ գազի հետ ազոտ կամ օդ են խառնում, այդ պատճառով են մարդիկ հունվարի համար շատ վճարել:
«Ինչպե՞ս կարող են թանկ ապրանքը ավելի էժանի հետ խառնել: Դա պարզապես անհնար է: Եթե այդքան էժան ազոտ կարող են գտնել, ապա ես այդ բողոքին կմիանամ: Օդի մասին էլ չեմ ուզում խոսել: Դա պայթյունավտանգ է: Նրանք այդպիսի բանի չէին դիմի»,-ասաց նա:
Կարեն Չիլինգարյանի խոսքով՝ մարդիկ շատ են վճարել, քանի որ այս ձմեռը չափազանց ցրտաշունչ էր:
«Այս ձմեռը շատ ցրտաշունչ էր: Մարդիկ տաքացուցիչները չէին անջատում, այդ պատճառով էլ շատ մեծ գումարներ են վճարել: Ուրիշ պատճառ չկա»,-նշեց նա:
