Երեւանում փետրվարի 16-ին ուշ երեկոյան տեղի է ունեցել ավազակային հարձակում:
Քննչական կոմիտեի մամուլի ծառայությունից հայտնում են, որ ժամը 23։30-ի սահմաններում առերեւույթ հանցագործություն կատարած 4 անձ մուտք են գործել Զ.Սարկավագի փողոցի 123/3 բնակելի շենքի բնակարաններից մեկը, բռնություն գործադրել սեփականատիրոջ եւ այդ պահին տանը գտնվող նրա ծանոթուհու նկատմամբ, հափշտակել կանխիկ գումար եւ դիմել փախուստի։ Բռնության հետեւանքով սեփականատիրոջը պատճառվել են մարմնական վնասվածքներ։
Դեպքի առթիվ հարուցվել է քրեական գործ՝ ՀՀ քրեական օրենսգրքի 175-րդ հովածի 2-րդ մասի հատկանիշներով։ Մշակվել է քննչական պլան, առաջ են քաշվել աշխատանքային վարկածներ, որոնք ստուգելու ուղղությամբ կատարվում են անհրաժեշտ քննչական եւ օպերատիվ-հետախուզական միջոցառումներ։ Հանձնարարություն է տրվել ոստիկանության համապատասխան ստորաբաժանումներին միջոցներ ձեռնարկել՝ առերեւույթ հանցագործություն կատարած անձանց ինքնությունը պարզելու եւ վարույթն իրականացնող մարմնին ներկայացնելու համար։