«Խաղաղության ջերմ մաղթանքներով Հայաստանից՝ Սիրիայի եղբայրական ժողովրդին». այս արտահայտությամբ մարդասիրական օգնությունը Սիրիա տեղափոխող երկրորդ օդանավը փետրվարի 17-ին՝ ուշ երեկոյան, վայրէջք է կատարել Սիրիայի Արաբական Հանրապետության ՌԴ «Հմեյմիմ» ռազմաբազայում: Այս մասին տեղեկացրել է ՀՀ Պաշտպանության նախարարությունը։
ՀՀ նախագահ Սերժ Սարգսյանի հանձնարարականով իրականացվող մարդասիրական առաքելության շրջանակում Սիրիա են տեղափոխվել առաջին անհրաժեշտության ապրանքներ՝ այդ թվում՝ ձեթ, ալյուր, պանիր, պահածոներ և հագուստ:
Ուղեբեռը տեղափոխած օդանավը ռազմաբազայում դիմավորել են Հալեպում ՀՀ գլխավոր հյուպատոս Տիգրան Գևորգյանն ու ՀՀ ԱԻՆ ներկայացուցիչ, գնդապետ Պավել Գյոզալյանը:
Մարդասիրական օգնությունը Հալեպում ՀՀ հյուպատոսության և ՌԴ Հակամարտող կողմերի հաշտեցման կենտրոնի համատեղ ջանքերով առաջիկա օրերին հավասարապես բաժանվելու է Լաթաքիայի, Դամասկոսի, Քեսաբի և Հալեպի հայկական համայնքների առավել կարիքավոր ընտանիքներին: