Պաշտպանական հարցերում կրթական բաղադրիչը պետք է կարեւոր դերակատարում ունենա։ Այս մասին նշվել է փետրվարի 18-ին Հայաստանի պաշտպանության նախարար Վիգեն Սարգսյանի եւ Թաֆթսի համալսարանի Ֆլեթչերի իրավունքի եւ դիվանագիտության դպրոցի դեկան Ջեյմս Ստավրիդիսի հանդիպման ընթացքում։
Հանդիպումը կայացել է Մյունխենի անվտանգության 53-րդ համաժողովի շրջանակում։ Քննարկվել են պաշտպանական ոլորտում ժամանակակից կրթական ծրագրերի իրականացման խնդիրները։
Վիգեն Սարգսյանը, մասնավորապես, ներկայացրել է Հայաստանի զինված ուժերում մեկնարկած նոր ծրագիրը, ըստ որի՝ զինծառայողներին հնարավորություն է տրվում ծառայության ընթացքում գիտելիքներ եւ հմտություններ ձեռք բերել նաև այնպիսի կարևոր ուղղություններում, ինչպիսին տեղեկատվական տեխնոլոգիաներն են։
Համաժողովի շրջանակում Վիգեն Սարգսյանն աշխատանքային քննարկումներ է ունեցել նաեւ Գերմանիայի, Սինգապուրի եւ Վրաստանի պաշտպանության նախարարների հետ։