Ես կարծում եմ, որ դուք լուրջ ժողովրդավարական քայլ եք կատարել: Ձեր երկրում բարձր քաղաքական մշակույթ է ձեւավորվել, որը եւս մեկ անգամ փաստում է, որ դուք քայլ առ քայլ լուծում եք Ձեր պետական կարեւորության հարցերը։ Այս մասին, այսօր՝ փետրվարի 19-ին, Ստեփանակերտում, ԼՂՀ Ազգային ժողովի նախագահ Աշոտ Ղուլյանի հետ հանդիպման ժամանակ նշել է Աբխազիայի Ժողովրդական Ժողովի փոխխոսնակ Էմմա Գամիսոնիան։
ԱԺ-ից NEWS.am-ին հայտնում են, որ հանդիպմանը մասնակցել են նաեւ Աբխազիայի խորհրդարանի պատգամավորներ Ախրա Պաչուլիան ու Լեւոն Գալստյանը, որոնք Ստեփանակերտ են ժամանել Արցախի Հանրապետության Սահմանադրության նախագծի հանրաքվեին դիտորդական առաքելություն իրականացնելու նպատակով:
Ողջունելով հյուրերին՝ Աշոտ Ղուլյանը նշել է, որ այս տարիների ընթացքում երկու երկրների միջեւ հարաբերությունները բավականին դրական տեղաշարժ են արձանագրել:
«Մենք անընդհատ նոր տարբերակներ ենք որոնում՝ հետագա մեր համագործակցությունը զարգացնելու ուղղությամբ, եւ այդ առումով լավ հեռանկար ունենք»,- ընդգծել է ԱԺ նախագահը:
Աբխազիայի Ժողովրդական ժողովի փոխխոսնակ Էմմա Գամիսոնիան՝ պատվիրակության անունից երախտագիտություն հայտնելով արցախցիների ջերմ ընդունելության համար՝ խորհրդարանի ղեկավարին է փոխանցել Աբխազիայի նախագահ Ռաուլ Խաջիմբայի ու խորհրդարանի նախագահ Վալերի Բգանբայի ողջույններն ու հանձնել Աբխազիայի խորհրդարանական ընտրություններին մասնակցելու հրավերը:
«Ես կարծում եմ, որ դուք լուրջ ժողովրդավարական քայլ եք կատարել: Ձեր երկրում բարձր քաղաքական մշակույթ է ձեւավորվել, որը եւս մեկ անգամ փաստում է, որ դուք քայլ առ քայլ լուծում եք Ձեր պետական կարեւորության հարցերը: Այն ինստիտուտները, որոնք մենք եւ դուք ստեղծում ենք՝ ուղղված են մեր ժողովրդի եւ մեր երկրների զարգացմանը»,- կարեւորել է Էմմա Գամիսոնիան:
Աբխազիայի ԱԺ պատգամավոր Լեւոն Գալստյանը, անդրադառնալով Արցախում սահմանադրական բարեփոխումների գործընթացին, դրական է գնահատել այն:
«Մեծ ուշադրությամբ հետեւել ենք այստեղ տեղի ունեցող սահմանադրական գործընթացին եւ պետք է ասեմ, որ բավականին դրական ենք գնահատում այն՝ հաշվի առնելով, որ այդ ողջ ընթացքում ներգրավել եք հասարակության լայն շրջանակներ»,-հավելել է Լեւոն Գալստյանը:
«Վստահ ենք, որ Ձեր հանրապետությունը մեծ հաջողությունների է հասնելու, քանի որ ժողովրդավարական արժեքների մեծ զարգացում ու աճ ենք նկատում: Կարծում եմ՝ Ձեր փորձը օգտակար կլինի նաեւ մեզ համար»,- նշել է Աբխազիայի ԱԺ պատգամավոր Ախրա Պաչուլիան:
Այնուհետեւ, խորհրդարանականների խնդրանքանքով, Աշոտ Ղուլյանն անդրադարձել է Արցախի Հանրապետության Սահմանադրության նախագծի առանձին դրույթներին եւ Աբխազիայում կայանալիք խորհրդարանական ընտրություններին:
Հանդիպմանը մասնակցել է նաեւ ԱԺ սոցիալական եւ առողջապահության հարցերի մշտական հանձնաժողովի անդամ Լյուդմիլա Բարսեղյանը:
