Չինաստանում 2018-ին կավարտեն 1 էքսաֆլոպս հզորությամբ սուպերհամակարգչի նախատիպի ստեղծման աշխատանքները: Այս մասին հայտնում է China Daily-ն՝ վկայակոչելով Տյանցզինում գտնվող Սուպերհամակարգիչների ազգային կենտրոնի ներկայացուցիչ Մեն Սյանֆեյին:
Աշխարհում ամենահզոր սուպերհամակարգչի նախատիպի ստեղծման մասին հայտարարվել է անցյալ տարվա նոյեմբերի սկզբին: Հունվարին հաղորդվել է, որ նախատիպը հնարավոր է ներկայացվի 2017-ի վերջին: Մեկ էքսաֆլոպսը հավասար է 1000 պետաֆլոպսի:
Սյանֆեյի խոսքով՝ նոր համակարգիչը կկոչվի «Տյանհե-3» (Tianhe-3), որը կօգնի գիտական ամենաբարդ խնդիրներն «ավելի մեծ ճշգրտությամբ, արագությամբ եւ այլ մասշտաբով» լուծել: Սուպերհամակարգչի օգտագործումը կարող է տարեկան մոտ 1,5 մլրդ դոլարի տնտեսական շահույթ բերել: