Գագիկ Ծառուկյանն ասաց՝ եկեք հավաքվենք լայն կոնսոլիդացիա անենք, եթե չհավաքվեցինք, ինչպե՞ս աներ այդ լայն կոնսոլիդացիան։ Այս մասին այսօր՝ փետրվարի 20–ին, լրագրողների հետ հանդիպման ժամանակ հայտարարել է տնտեսագետ, ԲՀԿ կուսակցության անդամ Վարդան Բոստանջյանն՝ անդրադառնալով դաշինքի լայն կոնսոլիդիացիայի գաղափարի տապալմանը։
«Գագիկ Ծառուկյանը ասաց՝ հանրություն, հասարակություն, քաղաքական ուժեր եկեք հավաքվենք իրար հետ համակարգը փոխենք ու հիմա եթե չենք հավաքվում, ո՞նց անես կոնսոլիդացիա, արհեստականորե՞ն... Հիմա, տեսեք էն ավանդական ուժերի առումով, պարզվեց՝ դրսից ներսից գզվռտոց կա, դուք էդպիսի մարդկանց կթողնեի՞ք ձեր տան մեջ։ Մենք ասում էինք՝ այսպիսի մեծ համակարգային փոփոխություններ կատարելու համար լայն կոնսոլիդացիա է պետք, չէին ասում՝ հիմա կստեղծենք։ Ընդամենը երկու միլիոնանոց երկիր ենք, հո Չինաստանում չենք գտնվում, որ 1,5 միլիարդանոց կոնսոլիդացիա անենք»,–ասել է նախկին պատգամավորը։
Ինչ վերաբերում է Սերժ Սարգսյանի հրաժարականը պահանջելուն, ԲՀԿ–ական տնտեսագետն ասաց. «Ընդհանուր առմամբ իշխանության համար պայքարը սարսափելի մի բան է, դա մարդկության ամբողջ պատմությունն է ցույց տալիս, հիմա Հայաստանի Հանրապետությունը չէր կարող էական տարբերվել դեպի լավը, նույն պրոցեսն է՝ ինչ հազարամյակներ շարունակ։ Կա ընդդիմություն, կա իշխանություն, հնարավոր է՝ ընդդիմությունը չունենա բավականին ուժ իշխանությանը պարտադրի լուծել այն խնդիրները, որոնք ծառացած են, բայց պետք չի պեսիմիստական հայացքներով պնդել, որ ոչինչ չի հաջողվում։ էս անգամ չհաջողվեց, մյուս անգամ կհաջողվի։ Պատմությունն է էդպես ցույց տալիս։ Ինչքան էլ տխուր է մեր իրականությունն այսօր, բայց փոքր ինչ առաջընթաց կա բոլոր տեղերում։ Ինկուբացիոն ժամանակահատվածը պահանջում է որոշակի ժամանակ»:
Նշենք, որ վերջինս «Ծառուկյան» դաշինքի համամասնական ցուցակի 4–րդ հորիզոնականում է։