ՀԱԿ խմբակցության պատգամավոր, նախկին վարչապետ Հրանտ Բագրատյանն այսօր՝ փետրվարի 20–ին լրագրողների հետ հանդիպման ժամանակ հայտարարել է, թե դիմել է վեց կուսակցությունների՝ դաշինք կազմելու համար, սակայն չի ստացվել։
«2016–ի փետրվարին դիմել եմ վեց կուսակցության, ասել եմ՝ եկեք վիճակահանություն անենք, 100 հազար դոլար դնենք, որ չգնանք իշխանությունից փող խնդրելու, բոլորի հետ հանդիպել եմ եւ ՀԱԿ նախագահ Լեւոն Տեր–Պետորսյանի եւ Լեւոն Զուրաբյանի հետ։ Ասել են՝ մենք խոշոր ենք, երեք հոգի մեզնից մեկը՝ ձեզնից։ «Ժառանգության» Րաֆֆի Հովյաննիսյանն ու Արմեն Մարտիրոսյանը մինչ էսօր չեն պատասխանել։ Չեմ պատկերացնում, որ էդքան մեծ բան են ներկայացնում, որ նախկին վարչապետին չպատասխանեն։ Նիկոլին եմ դիմել մի քանի անգամ, սկզբից ասել է՝ «Քաղաքացիական պայմանագրով» ենք գնում, Սասուն Միքայելյանը համագումարից հետո հրավիրեց, խոսեցինք, մինչեւ նոյեմբերի 23–ը չպատասխանեցին, եւ ասեցի՝ ուշ ա, ես ինձ վարչապետ եմ տեսնում։ Նորից կապվել է Փաշինյանը, ասել է՝ գնանք համաձայնեցնենք Մարուքյանի հետ, գնացել ու չի զանգել։ Ես պարտավոր եմ՝ էս ամեն ինչ մասին տեղեկացնել հանրությանը»,–ասել է Հրանտ Բագրատյանը։
ՀԱԿ պատգամավորը նշեց, որ Կոնգրեսում իրեն առաջարկվել է լինել 7–րդ հորիզոնականում, ինչին դեմ է եղել:
«Նույն ՀԱԿ–ը ազատական թեւ է, բայց երկու լուրջ պրոբլեմ ունենք։ ՀԱԿ–ը պետք է փորձի համոզել, որ փուլային լուծումը կարող է ընդհանրապես լուծում լինել Ղարաբաղում, որ խաղաղություն կլինի, այլ ոչ թե նոր բորբոքված պատերազմ։ Եւ երկրորդ խնդիրը՝ մենք պիտի հասկանանք մեր անկախ պետականությունը եւ հայ-ռուսական հարաբերությունները: Մենք էլ ենք ստրատեգիական հարաբերությունների կողմնակից, բայց չափ գություն ունի։ Այնուամենայնիվ, սրանք լուծելի խնդիրներ են, եթե հավասար են պայմանները: Կներեք, բայց ես չէի կարող լինել ՀԱԿ–ում 7–րդ համարը։ Բացի առաջին նախագահից, մյուս 5 հոգուն չեմ տեսնում, որ ինձանից բարձր են։ Կամ պիտի վիճակահանություն լինի, կամ ինչ–որ մեխանիզմ»,–նշեց նախկին վարչապետը։
Բագրատյանն ասաց, որ «Ազատ դեմոկրատներ» կուսակցության առաջնորդ Խաչատուր Քոքոբելյանի հետ պայմանավորվել են, որ վերջինս կլինի համապետական ցուցակի առաջնորդը, իսկ Բագրատյանը ընտրվելուց հետո խորհրդարանում խմբակցության ղեկավարը։ Նշենք, որ Հրանտ Բագրատյանը նաեւ առաջադրվել է Կենտրոն–Նորք Մարաշ–Էրեբունի ընտրական տարածքում եւ իր մրցակիցը համարում է հանրապետականներին։
