Արցախի ժողովուրդը հանաքվեներին մասնակցելու փորձ ունի եւ ինչպես նախորդ դեպքերում, այս անգամ եւս ակնկալվում է մասնակցության բարձր աստիճան: Այս մասին, այսօր՝ փետրվարի 20-ին, դիտորդական առաքելությամբ Ֆրանսիական Հանրապետությունից Արցախ ժամանած պատվիրակության անդամների հետ հանդիպման ժամանակ նշել է ԼՂՀ Ազգային ժողովի նախագահ Աշոտ Ղուլյանը:
Ֆրանսիական պատվիրակության կազմում են նախկին պատգամավոր Ժորժ Կոլոմբիեն, նախկին դիվանագետ Մորիս Բոննոն, իրավաբան Պիեռ դ’Էսպերոնան, եւ Դեսին քաղաքի ավագանու անդամ Դենիս Ջորկայեֆը:
ԼՂՀ ԱԺ-ից NEWS.am-ին հայտնում են, որ խորհրդարանի նախագահը ընդգծել է Արցախի եւ Ֆրանսիայի միջեւ առանձնահատուկ հարաբերությունների ջերմությունը եւ նշել, որ Ղարաբաղում մշտապես ուրախ են ընդունելու ֆրանսիացի բարեկամներին:
«Մեզ համար փետրվարի 20-ը հիշարժան օր է. 29 տարի առաջ այս օրը մենք ազատության դրոշ ենք բարձրացրել եւ առաջին քայլը կատարել դեպի ժողովրդավարություն: Այդ ողջ ընթացում մեր ֆրանսիացի բարեկամները եղել են մեր կողքին»,- նշել է Աշոտ Ղուլյանը:
Ժորժ Կոլոմբիեն պատվիրակության անունից շնորհակալություն է հայտնել ընդունելության համար եւ նշել, որ արդեն եղել են որոշ ընտրատեղամասերում եւ գոհ են հանրաքվեի ընթացքից: Անդրադառնալով Սահմանադրության հանրաքվեին՝ Ժորժ Կոլոմբիեն հետաքրքվել է ակնկալվող արդյունքներով:
Պատասխանելով հարցին՝ Աշոտ Ղուլյանը նշել է, որ Արցախի ժողովուրդը հանաքվեներին մասնակցելու փորձ ունի եւ ինչպես նախորդ դեպքերում, այս անգամ եւս ակնկալվում է մասնակցության բարձր աստիճան:
Այնուհետեւ խորհրդարանի նախագահը ներկայացրել է Սահմանադրական բարեփոխումների գործընթացը՝ նախաձեռնությունից մինչեւ հանրաքվե եւ մանրամասն անդրադարձել Սահմանադրության նախագծով առաջարկվող փոփոխություններին:
Հանդիպմանը քննարկվել են նաեւ երկկողմ համագործակցության հեռանկարները եւ տարածաշրջանային ու միջազգային զարգացումների ազդեցությունը ղարաբաղյան հակամարտության կարգավորման գործընթացի վրա: