Արագածոտնի մարզի Թալինի տարածաշրջանի Կարմրաշեն, Ոսկեթաս եւ Զովասար գյուղերը կապող ճանապարհը կհիմնանորոգվի: Այս մասին հաղորդագրություն է տարածել ՀՀ տրանսպորտի, կապի եւ տեղեկատվական տեխնոլոգիաների նախարարությունը:
Նախարար Վահան Մարտիրոսյանն այցելել է Արագածոտնի մարզի Թալինի տարածաշրջանի Կարմրաշեն, Ոսկեթաս եւ Զովասար գյուղեր։
Բարձր լեռնային այս գյուղերը մարզկենտրոնին կապող միակ՝ կենսական նշանակության ճանապարհը տարիներ ի վեր չհիմնանորոգվելով՝ ամբողջովին քայքայվել, դժվարանցանելի է դարձել։
Համայնքի ղեկավարները բազմիցս են դիմել իշխանություններին խնդիրը լուծելու համար։ ՀՀ նախագահի հանձնարարությամբ 12 կմ երկարությամբ ճանապարհը կհիմնանորոգվի. այն ընդգրկվել է Համաշխարհային բանկի միջոցներով հիմնանորոգվող «Կենսական նշանակության ճանապարհացանցի բարելավման» 2017թ. ծրագրում։
Նախարարին անձամբ հանդիպելու, իրենց հուզող հարցերը նրան ուղղելու նպատակով Կարմրաշեն գյուղի կենտրոնում հավաքված երեք գյուղերի բազմաթիվ բնակիչներ խնդիրներ շատ ունեին, սակայն նրանց համար առաջնահերթը ճանապարհի հարցի լուծումն է։
Նախարարը հավաստիացրեց, որ ճանապարհն այս տարի անպայման կհիմնանորոգվի. «Մինչեւ մարտի վերջ կսկսվեն նախագծային աշխատանքները։ Ըստ ընթացակարգի՝ կանցկացվեն մրցույթները։ Հուլիսին արդեն կտրվի շինարարության մեկնարկը, եւ մինչեւ տարեվերջ կունենաք բարձրակարգ ասֆալտապատ ճանապարհ»,- նշեց նախարարը։
Որպեսզի աշխատանքներն ընթանան առավելագույնս արագ, նախատեսվում է հիմնանորոգումն սկսել միաժամանակ ճանապարհի երկու ծայրակետերից՝ սկզբից եւ վերջից։
Բացի ասֆալտապատումից, ճանապարհի ամբողջ երկայնքով կկառուցվի ջրահեռացման համակարգ, իսկ գյուղամիջյան հատվածներում՝ նաեւ մայթեր։ Հիմնանորոգման աշխատանքների ավարտից հետո ճանապարհը կկահավորվի ճանապարհային նշաններով եւ անվտանգության տարրերով։
Նախարարն ընդգծեց, որ ճանապարհի հիմնանորոգման աշխատանքների ավարտից հետո լուծում կտրվի նաեւ տրանսպորտի խնդրին։
