ԵՏՄ-ին Հայաստանի մասնակցության արդյունքը կարող էր ավելի լավը լինել։ Այս մասին հայտնել է Հայաստանի արտգործնախարար Էդվարդ Նալբանդյանը DW հեռուստաընկերությանը տված հարցազրույցում։
Նրա խոսքով, Հայաստանի նման փոքր, բայց բավականին բաց տնտեսությամբ երկրների վրա ազդում են նաեւ արտաքին տարատեսակ տնտեսական բացասական միտումներ։ «Այնպես, ինչպես ազդում են ԵՄ շատ ուրիշ երկրների վրա։ Ոչ հեշտ տնտեսական կոնյուկտուրայի պայմաններում, մեր միավորումը, պետք է նրան պատշաճը մատուցել, մեզ հնարավորություն է տվել մուտք գործել բավականին մեծ շուկա։ Այն ինչ արտադրվում է Հայաստանում, զրոյական մաքսատուրքով ու առանց որեւէ վարչական խոչընդոտների գնում է այդ հսկայական սպառողական շուկա։ Իսկ դա կարեւոր է։ Իսկ (աճի-խմբ․) միտում կա ՝ ասենք վերջին տարում՝ այսինքն 2016-ին, Հայաստանի արտահանումը ավելացել է 50 տոկոսով։ Դուք հասկանում եք, թե ինչ թվերի մասին է խոսքը»։
Այն դիտարկմանը, որ այդ թվերը ճգնաժամից հետո վերականգնողական աճն են արտացոլում ու որ ցուցանիշները հասել են 2013- ի մակարդակին՝ Նալբանդյանը նշեց, որ կան երկրներ, որոնք գլոբալ խնդիրների, ընդհանուր համաշխարհային կոնյուկտուրայի պատճառով ճգնաժամ են ապրում։ «Եվ այդ ճգնաժամը շարունակվում է ու շարունակվում։ Իսկ մեզ մոտ այնուամենայնիվ կա՛ դրական միտում»։
Պատասխանելով այն հարցին, որ ի տարբերություն ԵՏՄ մյուս անդամ երկրների, որոնք ծայրաստիճան քննադատաբար են արտահայտվում՝ միայն Հայաստանն է առայսօր առավելություններ տեսնում՝ Նալբանդյանը նկատեց, որ համամիտ չէ, թե միայն Հայաստանն է դրական տրամադրված։ «Քննադատությունը միշտ էլ լավ է։ Եթե այն ուղղված է պայմանները բարելավելուն, հեռանկարները տեսնելուն, եւ բնականաբար այդ առումով քննադատությունը պետք է դիտարկել որպես դրական երեւույթ։ Եվ ոչ թե գլխին մոխիր լցնել ու ասել, թե ամեն ինչ ինչքան վատ է», ամփոփել է նա։
