Ոստիկանությունն այսօր հրապարակել է ընտրողների նախնական ցուցակները: Դրանք փակցվել են ընտրատեղամասերում, տեղադրվել ոստիկանության կայքում: Ցուցակներում անճշտություններ հայտնաբերելու դեպքում հարկավոր է մինչեւ մարտի 23-ը դիմել տարածքային անձնագրային ծառայություն կամ անձնագրային եւ վիզաների վարչություն:
Նիկոլ Փաշինյանը, սակայն, արդեն ահազանգում է. Հայաստանում ընտրողների զանգվածային տեղաշարժեր են տեղի ունենում: Փաշինյանը դիմել է ոստիկանություն եւ պարզել, որ մեկ ամսվա ընթացքում՝ հունվարի 10-ից մինչեւ փետրվարի 10-ը, 7 հազար ընտրող փոխել է հաշվառման վայրը:
Կենտրոնական ընտրական հանձնաժողովն էլ շարունակում է ուսումնասիրել կուսակցությունների եւ դաշինքների ներկայացրած փաստաթղթերը: ԿԸՀ-ն աշխատում է ընտրություններն ապրիլի 2-ին անցկացնելու ժամանակացույցով: Քվեարկության օրը փոխելու հարցում քաղաքական ուժերը, փաստորեն, չկարողացան հաջողության հասնել: ՀԱԿ-ի ստորագրահավաքը ձախողվեց, ՀՅԴ-ն էլ կարծում է, որ ճիշտ կլիներ, եթե դա Հանրապետական կուսակցությունը նախաձեռներ: Եթե քաղաքական մյուս ուժերը, այնուամենայնիվ, նման բան նախաձեռնեն, ՀՅԴ-ն ու ԲՀԿ-ն կմիանան:
Զարուհի Փոստանջյանը հեռացավ «Ժառանգություն»-ից, բայց Արմեն Մարտիրոսյանը դեռ հույս ունի, որ իրենց ուղիները կխաչվեն: Հարգում է Փոստանջյանի որոշումը, բայց համամիտ չէ նրա հայտարարությանը, որ «Ժառանգություն»-ը հեռացել է իր որդեգրած սկզբունքներից ու գաղափարներից:
Մարտիրոսյանն անդրադարձել է նաեւ Սեյրան Օհանյանի եւ Րաֆֆի Հովհաննիսյանի նախկին հարաբերություններին եւ խնդրել չշահարկել երբեմնի տարաձայնությունները:
Հայ ազգային կոնգրեսն էլ ընտրությունների է գնում՝ երկիրը դեպի լավը փոխելու ցանկությամբ: Ու թեեւ ՀԺԿ-ի հետ դաշինք կազմելու արդյունքում ստիպված կլինի հաղթահարել ոչ թե ձայների 5, այլ 7 տոկոսի շեմը, բայց, Արամ Մանուկյանի հավաստմամբ, դրանից չեն վախենում. եթե խորհրդարան չանցնեն, նշանակում է՝ այնտեղ անելիք չունեն:
Արցախը նոր Սահմանադրություն ունի: Հրապարակվել են նախօրեին կայացած հանրաքվեի նախնական արդյունքները, որոնց համաձայն՝ սահմանադրական փոփոխություններին կողմ է արտահայտվել քվեարկած քաղաքացիների 87.6 տոկոսը, դեմ՝ 9.7 տոկոսը:
Կարեն Կարապետյանը ցանկացած ոլորտում ծախսերի արդյունավետություն է պահանջում: Այսօր այդ մասին խոսել է նաեւ Հայաստանի զարգացման հիմնադրամի հոգաբարձուների խորհրդի նիստում: Հիշեցրել է, որ միջոցները Հիմնադրամին պետբյուջեից են տրամադրվում, եւ պահանջել դրանց ծախսման տրամաբանությունը ներկայացնել: Հակառակ դեպքում, ըստ Կարապետյանի, ավելի լավ կլինի որեւէ արտադրություն հիմնել եւ մարդկանց աշխատանքով ապահովել:
Իսկ փետրվարի 23-24-ը վարչապետը բավական մեծ պատվիրակությամբ պաշտոնական այցով Վրաստանում կլինի: Պատվիրակության կազմում մի շարք նախարարներ եւ փոխնախարարներ կան, ընդհանուր առմամբ՝ 20 մարդ:
Հայկական դեղորայքի շուկայում կեղծված դեղեր են հայտնաբերել՝ հակաբիոտիկ Ցեֆտրիակսոն-Աստերիա եւ ճնշող իջեցնող Պրեստանս: Կասկածելի դեղերը փորձաքննության են ուղարկել, արդյունքում կեղծիքը հաստատվել է: Դրանք հայտնաբերել են Երեւանում, ինչպես նաեւ Արմավիրի, Լոռու, Կոտայքի, Շիրակի մարզերի դեղատներում:
Կասկած են հարուցել սերիայի տարբերությունն ու հսկիչ դրոշմապիտակի բացակայությունը: Փորձաքննությունից հետո պարզ կդառնա, դեղամիջոցը կեղծ է քիմիական բաղադրությամբ, թե՞ պարզապես վերափաթեթավորել են ժամկետանց դեղորայքը: Դատելով տուփից՝ կեղծ Պրեստանսը Ռուսաստանում են փաթեթավորել, բայց գրությամբ այն տարբերվում է Հայաստանում եւ Ռուսաստանում գրանցված փաթեթավորումից: Արդեն հրահանգվել է հետ կանչել եւ ոչնչացնել նշված դեղամիջոցները:
Ադրբեջանի նախագահ Իլհամ Ալիեւը կնոջը՝ Մեհրիբանին, երկրի առաջին փոխնախագահ է նշանակել: Պարզաբանել է. իր կինն աչքի է ընկել հասարակական-քաղաքական, մշակութային ու միջազգային արդյունավետ գործունեությամբ: Քաղաքագետների կարծիքով, սա ընդամենը սուլթանություններին բնորոշ տրամաբանություն է, իշխանությունն ընտանեկան նեղ շրջանակում պահելու ձգտում:
Գեղարքունիքի մարզում մահվան ելքով պատահար է տեղի ունեցել: Քարվաճառ-Վարդենիս ավտոճանապարհին «Mitsubishi» մակնիշի մեքենան դուրս է եկել ճանապարհի երթեւեկելի հատվածից եւ գլորվել ձորը: Պատահարի հետեւանքով 56-ամյա ուղեւորը տեղում մահացել է: Մեքենայում գտնվող Ծակքար գյուղի երկու բնակիչներին հիվանդանոց են տեղափոխել: Տուժածների վիճակը բավարար է:
Փետրվարի 21-ին դոլարի փոխարժեքը շարունակել է աճել, իսկ եվրոն զգալիորեն էժանացել է: Արդյունքում դոլարի փոխարժեքն այսօր կազմել է 486 դրամ, եվրոյինը՝ 513, ռուբլունը՝ 8 դրամ 40 լումա, ֆունտինը՝ 605 դրամ:
Փետրվարի 22-ին հանրապետությունում սպասվում է առանց տեղումների եղանակ: Փետրվարի 23-ից օդի ջերմաստիճանը կբարձրանա 10-15 աստիճանով: Երեւանում նույնպես վաղը տեղումներ չեն սպասվում: